പൊലീസ് യൂണിഫോമിട്ട് ജന്തർ മന്തറിൽ നുഴഞ്ഞുകയറാൻ പദ്ധതി; സുവേന്ദു അധികാരിയെ ലക്ഷ്യമിട്ട ജെയ്ഷ് ബന്ധമുള്ള യുവാവ് പിടിയിൽ, കുടുക്കിയത് ഹണിട്രാപ്പ് അന്വേഷണം

ബംഗാളിലെ പൂർവ ബർധമാൻ ജില്ലയിൽ നിന്ന് അറസ്റ്റിലായ തീവ്രവാദ ബന്ധമുണ്ടെന്ന് സംശയിക്കുന്ന യുവാവിനെപ്പറ്റി കൂടുതൽ വിവരങ്ങൾ പുറത്തുവിട്ട് സ്പെഷ്യൽ ടാസ്ക് ഫോഴ്സ് (എസ്ടിഎഫ്). പാക്കിസ്ഥാൻ ആസ്ഥാനമായുള്ള ജെയ്ഷ്-ഇ-മുഹമ്മദ് തീവ്രവാദ സംഘടനയുമായി ബന്ധമുണ്ടെന്ന് സംശയിക്കുന്ന മുഹമ്മദ് ഹമീം മൊണ്ടലാണ് വെള്ളിയാഴ്ച ബംഗാളിൽ നിന്ന് അറസ്റ്റിലായത്; പിന്നീട് അതേ രാത്രി തന്നെ ചോദ്യം ചെയ്യലിനായി കൊൽക്കത്തയിലേക്ക് കൊണ്ടുവന്നു.

ബംഗാൾ മുഖ്യമന്ത്രി സുവേന്ദു അധികാരിയെ ലക്ഷ്യമിട്ടെന്നും, ദില്ലിയിലെ ജന്തർ മന്തറിൽ നടന്ന കോക്ക്‌റോച്ച് ജനതാ പാർട്ടി (CJP) പ്രതിഷേധത്തിനിടെ പൊലീസ് യൂണിഫോം ധരിച്ച് നുഴഞ്ഞുകയറാൻ പദ്ധതിയിട്ടെന്നും എസ്ടിഎഫ് ഇൻസ്പെക്ടർ ജനറൽ ഗൗരവ് ശർമ കൊൽക്കത്തയിൽ വാർത്താസമ്മേളനത്തിൽ പറഞ്ഞു. നീറ്റ് ചോദ്യപ്പേപ്പർ ചോർച്ചയുമായി ബന്ധപ്പെട്ട ഈ വിദ്യാർത്ഥി പ്രതിഷേധം അട്ടിമറിക്കുകയായിരുന്നു ലക്ഷ്യമെന്ന് ശർമ വ്യക്തമാക്കി.

“മുഖ്യമന്ത്രി അയാളുടെ ഒരു ടാർജറ്റ് ആയിരുന്നു. മുഖ്യമന്ത്രിക്ക് സുരക്ഷയില്ലാത്ത സ്ഥലങ്ങളെക്കുറിച്ച് വിവരങ്ങൾ ശേഖരിക്കാൻ അയാളോട് ആവശ്യപ്പെട്ടിരുന്നു” എന്ന് ശർമ പറഞ്ഞു. സുവേന്ദു അധികാരിക്ക് പുറമെ, മറ്റ് ബിജെപി നേതാക്കളും പൊലീസ് ഉദ്യോഗസ്ഥരും രാഷ്ട്രീയ നേതാക്കളും ഈ തീവ്രവാദ ശൃംഖലയുടെ നിരീക്ഷണ പട്ടികയിലുണ്ടായിരുന്നതായി പ്രാഥമിക അന്വേഷണത്തിൽ കണ്ടെത്തിയതായും ഉദ്യോഗസ്ഥൻ കൂട്ടിച്ചേർത്തു. പാക്കിസ്ഥാൻ ആസ്ഥാനമായ കൈകാര്യകർത്താക്കളുടെ നിർദേശപ്രകാരമാണ് ഹമീം പ്രവർത്തിച്ചതെന്നും അന്വേഷണത്തിൽ സ്ഥിരീകരിച്ചു. എസ്ടിഎഫ് കസ്റ്റഡിയിലെടുത്ത ഹമീമിനെ കോടതിയിൽ ഹാജരാക്കി; 14 ദിവസത്തേക്ക് പൊലീസ് കസ്റ്റഡിയിൽ വിട്ടു.

ഹമീമിന്റെ കാമുകി അർപ്പിത സർക്കാരിനെയും വെള്ളിയാഴ്ച രാത്രി എസ്ടിഎഫ് അറസ്റ്റ് ചെയ്തിരുന്നു. ബംഗാൾ സഹമന്ത്രിയുടെ മകനെ ഹണിട്രാപ്പിൽ കുടുക്കി തട്ടിക്കൊണ്ടുപോയി പണം തട്ടിയെടുക്കാൻ ഇരുവരും ചേർന്ന് ഗൂഢാലോചന നടത്തിയതായി ആരോപണമുണ്ട്. ഈ ഗൂഢാലോചനയും പാക്കിസ്ഥാൻ ആസ്ഥാനമായ ഷഹ്സാദ് ഭട്ടി സംഘത്തിന്റെ നിർദേശപ്രകാരമായിരുന്നു എന്ന് മുതിർന്ന എസ്ടിഎഫ് ഉദ്യോഗസ്ഥൻ വ്യക്തമാക്കി. രാഷ്ട്രീയക്കാർ ഉൾപ്പെടെ നിരവധി പ്രമുഖരെ ഹണിട്രാപ്പിൽ കുടുക്കി വിവരങ്ങൾ ശേഖരിച്ച് അർപ്പിത ഹമീമിന് കൈമാറിയതായും അന്വേഷണസംഘം കണ്ടെത്തി.

സമൂഹ മാധ്യമം വഴിയാണ് ഹമീമും അർപ്പിതയും പരിചയപ്പെട്ടത്; 4 വർഷമായി ഇവർ പ്രണയത്തിലായിരുന്നു. ഹണിട്രാപ്പ് കേസിന്റെ അന്വേഷണത്തിനിടെ അർപ്പിതയുടെ സമൂഹ മാധ്യമങ്ങൾ പരിശോധിച്ചതിൽ നിന്നാണ് ഹമീമിന്റെ പ്രവർത്തനങ്ങളെപ്പറ്റി അന്വേഷണസംഘത്തിന് സംശയമുണ്ടായത്. അർപ്പിതയുടെ കയ്യിൽ നിന്ന് ബ്രിട്ടൻ, മെക്സിക്കോ എന്നിവിടങ്ങളിൽ നിന്നുള്ള രാജ്യാന്തര സിം കാർഡുകളും കണ്ടെടുത്തിട്ടുണ്ട്; സ്ലീപ്പർ സെല്ലുകളുമായുള്ള ആശയവിനിമയത്തിന് ഇവ ഉപയോഗിച്ചിരിക്കാമെന്നാണ് കണ്ടെത്തൽ.

തീവ്രവാദ ശൃംഖലയുടെ യഥാർത്ഥ വ്യാപ്തി കണ്ടെത്താനും സംഘത്തിലെ മറ്റ് അംഗങ്ങളെ കണ്ടെത്താനുമുള്ള അന്വേഷണം തുടങ്ങിയെന്ന് എസ്ടിഎഫ് അറിയിച്ചു. പാക്കിസ്ഥാനിലെ ഷഹ്സാദ് ഭട്ടി സംഘവുമായി ഇവർക്ക് ബന്ധമുണ്ടെന്ന് അന്വേഷണത്തിൽ കണ്ടെത്തി. ഇവർക്ക് പാക്കിസ്ഥാൻ ബന്ധമുണ്ടെന്ന് തെളിയിക്കുന്ന വാട്സാപ്പ് ചാറ്റുകളും കണ്ടെത്തിയതായി പൊലീസ് അറിയിച്ചു.