പാലക്കാട് : നെന്മാറ പോത്തുണ്ടി ഇരട്ടക്കൊലപാതക കേസിൽ പ്രതി ചെന്താമരയുടെ (59) ശിക്ഷാവിധി ഇന്നും അനിശ്ചിതത്വത്തിൽ തുടരുന്നു. ജൂലൈ 15ന് വിധി പ്രഖ്യാപിക്കുമെന്ന് പ്രതീക്ഷിച്ചിരുന്നെങ്കിലും അത് നീണ്ടു. ഇന്ന് (ജൂലൈ 16) ജില്ലാ നിയമസഹായ വേദിയുടെ കൗൺസിലിങ് റിപ്പോർട്ട് കോടതിയിൽ സമർപ്പിക്കും. ഈ റിപ്പോർട്ട് പരിഗണിച്ച ശേഷം മാത്രമായിരിക്കും കോടതി അന്തിമ ശിക്ഷ വിധിക്കുക.
2002ലെ സുപ്രീം കോടതി മാർഗനിർദേശത്തിന്റെ അടിസ്ഥാനത്തിൽ നിയമസഹായ വേദി ഇടപെട്ട്, ചെന്താമരയെ കഴിഞ്ഞ രണ്ട് ദിവസങ്ങളിലായി കൗൺസിലിങ്ങിന് വിധേയമാക്കിയിരുന്നു. കൗൺസിലിങ്ങിനോടുള്ള പ്രതികരണം, ശരീരഭാഷ, മാനസികനില എന്നിവ വിലയിരുത്തിയുള്ള റിപ്പോർട്ടാണ് ഇന്ന് കോടതിയിൽ എത്തുക.
എന്നാൽ ഇന്നും അന്തിമ വിധി പ്രഖ്യാപിക്കാൻ സാധ്യത കുറവാണെന്നാണ് പ്രോസിക്യൂഷൻ അറിയിച്ചത്. വീഡിയോ കോൺഫറൻസിലൂടെ പ്രതിയെ ഹാജരാക്കാൻ കോടതി നിർദേശിച്ചിട്ടുണ്ട്.
വധശിക്ഷ നൽകണമെന്നാണ് പ്രോസിക്യൂഷന്റെ ആവശ്യം. ചെന്താമര സ്ഥിരം കുറ്റവാളിയാണെന്നും സമൂഹത്തിന് ആപത്താണെന്നും വീണ്ടും കുറ്റകൃത്യം നടത്താൻ സാധ്യതയുണ്ടെന്നും പ്രോസിക്യൂഷൻ വാദിച്ചു. മാനസാന്തരപ്പെടാൻ അവസരം നൽകണമെന്നും മുൻകാല സ്വഭാവം പരിഗണിക്കരുതെന്നും സാഹചര്യ തെളിവ് മാത്രമേയുള്ളൂ എന്നുമായിരുന്നു പ്രതിഭാഗത്തിന്റെ വാദം.
ജൂലൈ 13ന് ചെന്താമര കുറ്റക്കാരനാണെന്ന് കോടതി കണ്ടെത്തിയിരുന്നു. “എന്തെങ്കിലും പറയാനുണ്ടോ” എന്ന ജഡ്ജിയുടെ ചോദ്യത്തിന് “എന്നെ തൂക്കിക്കൊല്ലാൻ വിധിച്ചോളൂ” എന്നും “ഞാൻ ഗാന്ധിജിയല്ല” എന്നും കൂസലില്ലാതെ പ്രതികരിച്ച ചെന്താമരയുടെ പെരുമാറ്റം വ്യാപക ചർച്ചയായിരുന്നു.
2025 ജനുവരി 27ന് പോത്തുണ്ടി സ്വദേശികളായ സുധാകരനെയും (55) അമ്മ ലക്ഷ്മിയെയും (75) വീടിനു മുന്നിൽവച്ച് വെട്ടിക്കൊലപ്പെടുത്തിയ കേസിലാണ് വിധി കാത്തിരിക്കുന്നത്. 2019ൽ സുധാകരന്റെ ഭാര്യ സജിതയെ ചെന്താമര കൊലപ്പെടുത്തിയ കേസിൽ ജാമ്യത്തിലിറങ്ങിയ സമയത്താണ് ഈ ഇരട്ടക്കൊല നടത്തിയത്. സജിത വധക്കേസിൽ 2025 ഒക്ടോബറിൽ ചെന്താമരയ്ക്ക് ഇരട്ട ജീവപര്യന്തവും പിഴയും കോടതി നേരത്തെ വിധിച്ചിരുന്നു.
Disclaimer:
“The images and content displayed on this website are used for news reporting, informational, and editorial purposes. Some images, videos, and media may be sourced from external platforms such as Google Images, Instagram, Facebook, X (Twitter), news agencies, official sources, and other publicly available internet sources. We do not claim ownership of third-party content unless explicitly stated.”
ഇനി കള്ളത്തരം നടക്കില്ല ; റേഷൻകടകളിൽ ഇ – ത്രാസ്
