തിരുവനന്തപുരം : കേരള പബ്ലിക് സർവീസ് കമ്മിഷന്റെ (പിഎസ്സി) വിശ്വാസ്യതയെ ചോദ്യം ചെയ്യുന്ന ഗുരുതര ക്രമക്കേട് വീണ്ടും കത്തുകയാണ്. സംസ്ഥാന ആസൂത്രണ ബോർഡിൽ ചീഫ് (ഇൻഡസ്ട്രി ആൻഡ് ഇൻഫ്രാസ്ട്രക്ചർ ഡിവിഷൻ) എന്ന ഉന്നത തസ്തികയിലേക്ക് നടന്ന പരീക്ഷയുടെ മൂല്യനിർണയത്തിലാണ് അട്ടിമറി നടന്നതെന്ന ഗുരുതര ആരോപണം ഉയരുന്നത്. അഡീഷണൽ സെക്രട്ടറി പദവിക്ക് തുല്യമായ ഈ തസ്തികയ്ക്ക് ഒന്നേകാൽ ലക്ഷം രൂപ അടിസ്ഥാന ശമ്പളമാണ് ലഭിക്കുന്നത്.
പരീക്ഷയെഴുതിയ ഒരു ഉദ്യോഗാർഥിയുടെ ഉത്തരക്കടലാസ് പകർപ്പ് പരിശോധിച്ചപ്പോൾ, 100 മാർക്കിൽ 58 മാർക്കിന്റെ ഉത്തരങ്ങൾ പരിശോധിക്കാതെ വിട്ടതായി കണ്ടെത്തി. ഒൻപത് മുതൽ 19 വരെയുള്ള ഉത്തരങ്ങൾക്ക് മാർക്ക് നൽകിയിട്ടില്ലായിരുന്നു. ഇക്കണോമിക്സ് പേപ്പറിലാണ് ഈ ക്രമക്കേട് നടന്നതെന്നാണ് പുറത്തുവരുന്ന വിവരം. നീറ്റ് പരീക്ഷ പേപ്പർ ചോർച്ചയിൽ പ്രതികരിച്ചവരെയൊന്നും ഈ വിഷയത്തിൽ കാണാത്തതെന്ത്? എന്ന തരത്തിൽ സമൂഹമാധ്യമങ്ങളിൽ വലിയ വിമർശനങ്ങളും കാണാം.
ഉത്തരക്കടലാസിന്റെ പകർപ്പിനായി അപേക്ഷിച്ച ഉദ്യോഗാർഥികളെ പിഎസ്സി ഒരു വർഷത്തോളം വട്ടം കറക്കിയെന്നാണ് ആരോപണം. വിവരാവകാശ നിയമപ്രകാരം അപേക്ഷ നൽകിയിട്ടും ഉത്തരക്കടലാസ് നൽകാൻ പിഎസ്സി തയാറായില്ല. അപ്പീലും തള്ളപ്പെട്ടതോടെ ഉദ്യോഗാർഥി വിവരാവകാശ കമ്മിഷനെ സമീപിച്ചു. കമ്മിഷൻ ഉത്തരക്കടലാസിന്റെ പകർപ്പ് നൽകാൻ ഉത്തരവിടുമെന്ന സാഹചര്യം വന്നപ്പോൾ മാത്രമാണ് വിവരം പുറത്തുവന്നത്.
2023 ജൂലൈ 13ന് നടന്ന പരീക്ഷയുടെ റാങ്ക് പട്ടിക പ്രസിദ്ധീകരിച്ചത് 2025 മേയ് 31നാണ്. ഏകദേശം രണ്ട് വർഷത്തെ കാലതാമസം. എന്നാൽ റാങ്ക് പട്ടിക വന്ന് വെറും മൂന്നാഴ്ചയ്ക്കുള്ളിൽ, പിഴവ് തിരുത്താതെതന്നെ അതിവേഗ നിയമന ശുപാർശ നൽകി എന്നതാണ് ഏറ്റവും ഗുരുതരമായ ആരോപണം. പരീക്ഷയിൽ ഒന്നാം റാങ്ക് നേടിയത് ഇടതു സർവീസ് സംഘടനയിലെ സജീവ പ്രവർത്തകനാണെന്ന് മറ്റ് ഉദ്യോഗാർഥികൾ ആരോപിക്കുന്നു. അടുത്ത മാസംതന്നെ ഇദ്ദേഹത്തിന് നിയമനവും നൽകി.
സംസ്ഥാന സർക്കാരിന് നേരിട്ട് ഉപദേശം നൽകുന്ന ആസൂത്രണ ബോർഡിലെ ഇത്രയും ഉന്നത പദവിയിലേക്കാണ് ഇത്തരത്തിൽ വഴിവിട്ട നിയമനം നടത്തിയെന്ന ആരോപണം ഉയരുന്നത് എന്നതാണ് വിഷയത്തിന്റെ ഗൗരവം വർധിപ്പിക്കുന്നത്.
വിവാദം കത്തിപ്പടർന്നതോടെ സംസ്ഥാന സർക്കാർ വിജിലൻസ് അന്വേഷണത്തിന് ഉത്തരവിട്ടു. ഭരണഘടനാ സ്ഥാപനമായ പിഎസ്സിയിൽ നടക്കുന്ന ക്രമക്കേടുകൾ അന്വേഷിക്കാൻ സർക്കാരിന്റെ മുൻകൂർ അനുമതി ആവശ്യമില്ലെന്ന് ഡയറക്ടർ ജനറൽ ഓഫ് പ്രോസിക്യൂഷനും നിയമവകുപ്പും വ്യക്തമാക്കിയിരുന്നു.
ഇതിനു പിന്നാലെ ക്രൈംബ്രാഞ്ച് പിഎസ്സി ഉദ്യോഗസ്ഥർക്കെതിരെ എഫ്ഐആർ രജിസ്റ്റർ ചെയ്തു, എന്നാൽ ആരുടെയും പേരെടുത്ത് പറയാതെയാണ് കേസെടുത്തത്. ചോദ്യപേപ്പർ മൂല്യനിർണയവുമായി ബന്ധപ്പെട്ട് ഡെപ്യൂട്ടി സെക്രട്ടറി, ജൂനിയർ സൂപ്രണ്ട്, സിസ്റ്റം അനലിസ്റ്റ് എന്നിങ്ങനെ മൂന്ന് ഉദ്യോഗസ്ഥരുടെ മൊഴി ഇതിനകം രേഖപ്പെടുത്തിക്കഴിഞ്ഞു.
വിഷയത്തിൽ മന്ത്രി ഒ.ജെ. ജെനീഷ് തന്നെ അട്ടിമറി സംശയിക്കുന്നതായി പരസ്യമായി പ്രതികരിച്ചു എന്നത് വിഷയത്തിന്റെ ഗൗരവം അടിവരയിടുന്നു. ഇൻഡസ്ട്രി ആൻഡ് ഇൻഫ്രാസ്ട്രക്ചർ ചീഫിനു പുറമേ, പെഴ്സ്പെക്ടീവ് പ്ലാനിങ് ഡിവിഷൻ ചീഫ്, പ്ലാനിങ് കോ-ഓർഡിനേഷൻ ഡിവിഷൻ ചീഫ് എന്നീ രണ്ട് ഉന്നത തസ്തികകളിലേക്കുള്ള അതേ പരീക്ഷയുടെ മൂല്യനിർണയത്തിലും സമാന ക്രമക്കേട് കണ്ടെത്തിയിട്ടുണ്ട്.
ഭരണഘടനാപരമായി സ്വതന്ത്രമായി പ്രവർത്തിക്കേണ്ട ഒരു സ്ഥാപനത്തിൽ, ഇത്രയും ഉന്നത തസ്തികയിലേക്കുള്ള നിയമനത്തിൽപ്പോലും ഇത്തരം ഗുരുതര ക്രമക്കേട് ആരോപിക്കപ്പെടുന്നത് പിഎസ്സിയുടെ വിശ്വാസ്യതയ്ക്ക് കനത്ത തിരിച്ചടിയാണ്.
Disclaimer:
“The images and content displayed on this website are used for news reporting, informational, and editorial purposes. Some images, videos, and media may be sourced from external platforms such as Google Images, Instagram, Facebook, X (Twitter), news agencies, official sources, and other publicly available internet sources. We do not claim ownership of third-party content unless explicitly stated.”
CBSE/ICSE പഠിച്ചവരുടെ മക്കൾക്ക് ജാതി തെളിയിക്കാൻ വഴിയില്ലാതാകുമോ? സംവരണ ആനുകൂല്യങ്ങൾക്ക് തടസ്സമാകുമെന്ന് ആശങ്ക, ബദൽ സംവിധാനം വേണമെന്ന് ആവശ്യം
