ഇവിടെ ജീവിതം വളരെ പ്രയാസകരമാണ്. എല്ലാം വെള്ളത്തിനടിയിലാണ്. ഇനി ഇത് ആവർത്തിക്കാതിരിക്കട്ടെ…; എൻജിനീയറാകാൻ സ്വപ്നം കാണുന്ന പത്ത് വയസ്സുകാരൻ ; പ്രതിസന്ധികളെക്കാൾ വലുതാണ് ഈ സ്വപ്നം!

നവസാരി (ഗുജറാത്ത്): മേൽക്കൂരയിൽ നിന്ന് വെള്ളം ഇറ്റുവീഴുന്നു, വീട് പൂർണമായും വെള്ളത്തിനടിയിൽ. നിരാശ തളംകെട്ടിനിൽക്കുന്ന ആ നിമിഷത്തിൽ കണ്ണീർ അടക്കി, തന്റെ ഭാവി കെട്ടിപ്പടുക്കാൻ വീണ്ടും എഴുന്നേറ്റു നിൽക്കുകയാണ് പത്ത് വയസ്സുകാരൻ വിരാൾ. എൻജിനീയറാകണം എന്നതാണ് അവന്റെ സ്വപ്നം.

ഗുജറാത്തിലെ നവസാരിയിൽ നിന്നും എൻഡിടിവി റിപ്പോർട്ട് ചെയ്തതാണ്  ഈ ഹൃദയസ്പർശിയായ കഥ. വെള്ളിയാഴ്ചയ്ക്കും ശനിയാഴ്ചയ്ക്കും ഇടയിൽ 24 മണിക്കൂറിനുള്ളിൽ 400 എംഎമ്മിലധികം മഴയാണ് ജില്ലയിൽ രേഖപ്പെടുത്തിയത്.  ഒരാഴ്ചയ്ക്കുള്ളിലെ രണ്ടാമത്തെ ശക്തമായ മഴ.

നൂറുകണക്കിന് വീടുകൾ വെള്ളത്തിനടിയിലായി, ആയിരക്കണക്കിന് ആളുകൾ ഭവനരഹിതരായി. നിരവധി കുട്ടികളുടെ ഭാവി അനിശ്ചിതത്വത്തിലായി . ഇപ്പോൾ അവരുടെ പ്രധാന ലക്ഷ്യം കുടുംബത്തെ പുതുതായി കെട്ടിപ്പടുക്കാൻ സഹായിക്കുക എന്നതാണ്.

എന്നാൽ സ്വപ്നങ്ങൾ ഇപ്പോഴും വെള്ളത്തിൽ മുങ്ങിപ്പോയിട്ടില്ല. അവരുടെ വീട് പൂർണമായും വെള്ളത്തിനടിയിലായിരുന്നു. വാതിൽ തകർന്നു, കട്ടിലുകളും തകർന്നു. അമ്മയ്ക്ക് പാചകം ചെയ്യാൻ വേറെ സ്ഥലമില്ലാത്തതിനാൽ, വിരാളിന്റെ മുറി തന്നെ അടുക്കളയായി മാറിയിരിക്കുന്നു.

അരയോളം വെള്ളത്തിൽ നിന്നുകൊണ്ട്, വെള്ളപ്പൊക്ക പ്രദേശത്തെ ദൈനംദിന പ്രയാസങ്ങളെക്കുറിച്ച് സംസാരിക്കവേ വിരാൾ പൊട്ടിക്കരഞ്ഞു. ആഴ്ചകളോളം നീണ്ട വെള്ളപ്പൊക്കത്തിന് ശേഷം, ഭക്ഷണമായാലും വെള്ളമായാലും ഓരോ അടിസ്ഥാന ആവശ്യവും ഒരു പോരാട്ടമായി മാറി. കുടുംബത്തിന് ശുദ്ധജലം ലഭ്യമല്ലാത്ത അവസ്ഥ. സഹോദരി ദിപീഷയ്ക്ക് വെള്ളം കൊണ്ടുവരാൻ ദൂരെ വരെ നടക്കേണ്ടി വരുന്നു.

“ഇവിടെ ജീവിതം വളരെ പ്രയാസകരമാണ്. എല്ലാം വെള്ളത്തിനടിയിലാണ്. ഇനി ഇത് ആവർത്തിക്കാതിരിക്കട്ടെ എന്ന് ഞാൻ ദൈവത്തോട് പ്രാർത്ഥിക്കുന്നു” വിരാൾ പറയുന്നു.

എന്നാൽ ചുവരിൽ തൂങ്ങിക്കിടക്കുന്ന മെഡലുകൾക്ക് പറയാനുള്ളത് മറ്റൊരു കഥയാണ്. എൻജിനീയറിങ് പഠിക്കണമെന്നാണ് വിരാളിന്റെ ആഗ്രഹം. പ്രതിസന്ധികൾ എത്ര വലുതായാലും അവൻ പിന്മാറാൻ തയാറല്ല. തന്റെ സ്വപ്നങ്ങൾ അതിനെക്കാൾ വലുതാണെന്ന ഉറച്ച വിശ്വാസമാണ് അവനുള്ളത്. കണ്ണീർ അടക്കിക്കൊണ്ട്, അമ്മയെ സഹായിക്കാൻ എൻജിനീയറാകണമെന്നാണ് തന്റെ ആഗ്രഹമെന്ന് വിരാൾ പറയുന്നു. കൈവിടാൻ വിസമ്മതിച്ച ആ അഭിലാഷങ്ങളുടെ ഓർമപ്പെടുത്തലാണ് ചുവരിലെ ആ മെഡലുകൾ. അധികൃതരോട് അവന് ഒരു അഭ്യർത്ഥന മാത്രമേയുള്ളൂ: “വീട് ഉണ്ടാക്കിത്തരണം.”

നവസാരിക്ക് അധികം അകലെയല്ലാതെയാണ് ഇന്ത്യയുടെ വജ്ര വ്യാപാര കേന്ദ്രമായ സൂറത്ത് സ്ഥിതി ചെയ്യുന്നത്. അവിടെയും വെള്ളപ്പൊക്കം സമാനമായ നാശം വിതച്ചു. ശാന്തദേവി മേഖലയിൽ കുറഞ്ഞത് 300 ഫാക്ടറികളാണ് വെള്ളത്തിനടിയിലായത്. വെള്ളനിരപ്പ് ഏകദേശം അഞ്ച് അടിയോളം ഉയർന്നു.

യന്ത്രസാമഗ്രികൾക്കാണ് ഏറ്റവും വലിയ നാശം സംഭവിച്ചത്. ഉത്പാദനം പൂർണമായി നിലച്ചു. കഴിഞ്ഞ 10 ദിവസമായി ആയിരക്കണക്കിന് വജ്ര കൈത്തൊഴിലാളികൾ ജോലിയില്ലാതെ കഴിയുകയാണ്. വ്യവസായം മന്ദഗതിയിലായ സാഹചര്യത്തിൽ, ഇവർക്ക് ഇതിനകം തന്നെ ആഴ്ചയിൽ നാല് ദിവസത്തെ ജോലി മാത്രമേ ലഭിച്ചിരുന്നുള്ളൂ. മഴ ഈ പ്രതിസന്ധിയെ ഇരട്ടിയാക്കി.

വെള്ളപ്പൊക്കം വജ്ര തൊഴിലാളികളുടെ ഉപജീവന പ്രതിസന്ധി കൂടുതൽ ആഴത്തിലാക്കി. കുറഞ്ഞത് 10,000 തൊഴിലാളികളെയെങ്കിലും ഇത് നേരിട്ട് ബാധിച്ചിട്ടുണ്ട്. യന്ത്രസാമഗ്രികൾക്കുണ്ടായ നാശം, തടസ്സപ്പെട്ട ഉത്പാദനം, തൊഴിലില്ലായ്മ എന്നിവ കാരണം സാമ്പത്തിക നഷ്ടം കോടികളിലേക്ക് എത്തുമെന്നാണ് കണക്കാക്കുന്നത്.