ഇന്ത്യയിലെ 31 മുഖ്യമന്ത്രിമാരുടെ ആകെ സമ്പത്ത് എത്രയാണെന്നറിയാമോ? ഞെട്ടരുത്, 3,660 കോടി രൂപ! അതായത് ഒരു മുഖ്യമന്ത്രിയുടെ ശരാശരി ആസ്തി 118 കോടി വരും. തിരഞ്ഞെടുപ്പിലെ സുതാര്യത ഉറപ്പാക്കാൻ പ്രവർത്തിക്കുന്ന സ്വതന്ത്ര സംഘടനയായ ADR പുറത്തുവിട്ട റിപ്പോർട്ടിലെ വിവരങ്ങൾ ഞെട്ടിക്കുന്നതാണ്
രാജ്യത്തെ 4 മുഖ്യമന്ത്രിമാർ 100 കോടിക്ക് മുകളിൽ ആസ്തിയുള്ളവരാണ്. ഒന്നാം സ്ഥാനത്ത് 1,413 കോടി ആസ്തിയുള്ള കർണാടക മുഖ്യമന്ത്രി ഡി.കെ ശിവകുമാറാണ്. 931 കോടിയുമായി ആന്ധ്ര മുഖ്യമന്ത്രി ചന്ദ്രബാബു നായിഡു രണ്ടാമതും, തമിഴ്നാട് മുഖ്യമന്ത്രിയായ സി. ജോസഫ് വിജയ് 648 കോടിയുമായി മൂന്നാം സ്ഥാനത്തുമുണ്ട്. രസകരമായ വസ്തുത എന്തെന്നാൽ, കൂട്ടത്തിൽ ഏറ്റവും കൂടുതൽ വാർഷിക വരുമാനമുള്ളത് വിജയ്യ്ക്കാണ്- വർഷം 184 കോടി രൂപ! അരുണാചൽ മുഖ്യമന്ത്രി പേമ ഖണ്ഡുവാണ് 332 കോടി ആസ്തിയുമായി നാലാമത്തെ കോടീശ്വരൻ.
മുഖ്യമന്ത്രിമാരുടെ സമ്പത്തിന്റെ സ്വഭാവം പരിശോധിച്ചാൽ മറ്റൊരു വലിയ കൗതുകം കാണാം. ഡി.കെ. ശിവകുമാറിന്റെ ആസ്തിയുടെ സിംഹഭാഗവും ബെംഗളൂരുവിലെയും ഡൽഹിയിലെയും കോടികളുടെ റിയൽ എസ്റ്റേറ്റ് വാണിജ്യ സമുച്ചയങ്ങളാണെങ്കിൽ, ചന്ദ്രബാബു നായിഡുവിന്റെ സമ്പത്തിന്റെ ഭൂരിഭാഗവും ഹെറിറ്റേജ് ഫുഡ്സ് ലിമിറ്റഡ് അടക്കമുള്ള ഓഹരി വിപണിയിലെ നിക്ഷേപങ്ങളാണ്. എന്നാൽ, തമിഴ്നാട് മുഖ്യമന്ത്രി സി. ജോസഫ് വിജയ്യുടെ സമ്പത്ത് ബാങ്ക് ഫിക്സഡ് ഡെപ്പോസിറ്റുകളിലും ആഡംബര വാഹനങ്ങളിലുമാണ് കേന്ദ്രീകരിച്ചിരിക്കുന്നത്.
അതേസമയം അരുണാചൽ മുഖ്യമന്ത്രി പേമ ഖണ്ഡുവിന് കോടികളുടെ സ്വത്തുണ്ടെങ്കിലും, സത്യവാങ്മൂലത്തിൽ സ്വന്തമായി വരുമാനമില്ല എന്ന് കാണിച്ചിരിക്കുന്നത് രാഷ്ട്രീയ നേതാക്കളുടെ സാമ്പത്തിക സ്രോതസ്സുകളിലെ വൈവിധ്യത്തെയും സങ്കീർണ്ണതയെയുമാണ് ചൂണ്ടിക്കാണിക്കുന്നത്.
ഏറ്റവും കുറവ് സമ്പത്തുള്ളത് ജമ്മു കശ്മീർ മുഖ്യമന്ത്രി ഉമർ അബ്ദുള്ളയ്ക്കാണ്, വെറും 55 ലക്ഷം രൂപ! പശ്ചിമ ബംഗാൾ മുഖ്യമന്ത്രി സുവേന്ദു അധികാരി 85 ലക്ഷം , രാജസ്ഥാൻ മുഖ്യമന്ത്രി ഭജൻ ലാൽ ശർമ്മ 1.46 കോടി എന്നിവരാണ് തൊട്ടുപിന്നിൽ. കേരള മുഖ്യമന്ത്രി വി.ഡി സതീശന്റെ ആസ്തി 6.65 കോടിയാണ്.
ഇനി ക്രിമിനൽ പശ്ചാത്തലത്തിലേക്ക് വരാം. രാജ്യത്തെ 45 ശതമാനം മുഖ്യമന്ത്രിമാർക്കും ക്രിമിനൽ കേസുകളുണ്ട്. ഇതിൽ 11 പേർക്കെതിരെ കൊലപാതകശ്രമം അടക്കമുള്ള അതീവ ഗുരുതരമായ കേസുകളാണുള്ളത്! തെലങ്കാന മുഖ്യമന്ത്രി രേവന്ത് റെഡ്ഡിയാണ് ഒന്നാമത്- 89 കേസുകൾ! തൊട്ടുപിന്നിൽ 29 കേസുകളുമായി സുവേന്ദു അധികാരിയുമുണ്ട്. അഴിമതി നിരോധന നിയമപ്രകാരം മുൻപ് ശിക്ഷിക്കപ്പെട്ട ഏക മുഖ്യമന്ത്രി സിക്കിമിന്റെ പി.എസ്. തമാങ് ആണ്.
വിദ്യാഭ്യാസത്തിന്റെ കാര്യത്തിൽ ഇവർ ഒട്ടും പുറകിലല്ല. 31-ൽ 9 പേർ ബിരുദാനന്തര ബിരുദധാരികളും, 3 പേർക്ക് ഡോക്ടറേറ്റുമുണ്ട്. കൂട്ടത്തിലെ ഏറ്റവും പ്രായം കുറഞ്ഞ മുഖ്യമന്ത്രിമാർ അരുണാചലിന്റെ പേമ ഖണ്ഡുവും മേഘാലയയുടെ കോൺറാഡ് സാങ്മയുമാണ് 44 വയസ്സ്. 75 വയസ്സുള്ള പുതുച്ചേരി മുഖ്യമന്ത്രി എൻ. രംഗസ്വാമിയാണ് കൂട്ടത്തിലെ കാരണവർ. മറ്റൊരു പ്രധാനപ്പെട്ട കാര്യം ഈ 31 മുഖ്യമന്ത്രിമാരിൽ ആകെ ഒരു വനിത മാത്രമേ ഉള്ളൂ- ഡൽഹി മുഖ്യമന്ത്രി രേഖ ഗുപ്ത.
ഇന്ത്യയിലെ സാധാരണക്കാരന്റെ ശരാശരി പ്രതിവർഷ വരുമാനവുമായി തതമ്യപ്പെടുത്തുമ്പോൾ, നാടുഭരിക്കുന്ന ജനപ്രതിനിധികളുടെ ഈ ഭീമമായ ആസ്തിയും കേസുകളുടെ എണ്ണവും ഗൗരവമേറിയ ചോദ്യങ്ങളാണ് ഉയർത്തുന്നത്. തിരഞ്ഞെടുപ്പ് ചെലവുകൾ കുത്തനെ ഉയർന്ന ഇക്കാലത്ത്, സാധാരണക്കാർക്ക് രാഷ്ട്രീയത്തിന്റെ ഉയർന്ന തലങ്ങളിലേക്ക് എത്താൻ സാധിക്കാത്തവിധം സമ്പത്തും അധികാരവും കുറച്ചുപേരിലേക്ക് മാത്രം ചുരുങ്ങുകയാണോ? ജനാധിപത്യത്തിന്റെ സുതാര്യത ഉറപ്പുവരുത്താൻ തിരഞ്ഞെടുപ്പ് പരിഷ്കരണങ്ങളും, ജനപ്രതിനിധികൾക്കെതിരായ ക്രിമിനൽ കേസുകളിൽ സമയബന്ധിതമായ വിചാരണയും എത്രത്തോളം അനിവാര്യമാണെന്നാണ് ഈ റിപ്പോർട്ട് നമ്മെ ഓർമ്മിപ്പിക്കുന്നത്.
Disclaimer:
“The images and content displayed on this website are used for news reporting, informational, and editorial purposes. Some images, videos, and media may be sourced from external platforms such as Google Images, Instagram, Facebook, X (Twitter), news agencies, official sources, and other publicly available internet sources. We do not claim ownership of third-party content unless explicitly stated.”
കശ്മീരിൽ കല്ലേറ് നിർത്തിച്ചവർ ഡൽഹിയിൽ കല്ലേറ് നിർത്തിക്കാൻ വന്നിട്ട് തിരിച്ചുപോയീന്ന് കേട്ടു. ശരിയാണോ ഗയ്സ് , കൃഷ്ണകുമാറിനെതിരെ ചന്തു,പേളിക്കും ട്രോൾ
