ടെഹ്റാൻ: യുഎസ്-ഇസ്രയേൽ ആക്രമണത്തിൽ കൊല്ലപ്പെട്ട ഇറാന്റെ മുൻ പരമോന്നത നേതാവ് ആയത്തുള്ള അലി ഖമനേയിയുടെ അന്ത്യോപചാര ചടങ്ങുകൾക്കായി വിപുലമായ ഒരുക്കങ്ങളുമായി ഇറാൻ ഭരണകൂടം രംഗത്തിറങ്ങി. കഴിഞ്ഞ ഫെബ്രുവരി 28-നായിരുന്നു ഖമനേയി കൊല്ലപ്പെട്ടത്. തുടർന്നുണ്ടായ യുദ്ധസാഹചര്യങ്ങൾ കാരണം മാറ്റിവെച്ച ചടങ്ങുകളാണ്, ഇരുരാജ്യങ്ങളും തമ്മിലുള്ള താൽക്കാലിക വെടിനിർത്തലിന് പിന്നാലെ ഇപ്പോൾ പുനരാരംഭിച്ചിരിക്കുന്നത്. ഇറാനിലെയും ഇറാഖിലെയും അഞ്ച് പ്രമുഖ നഗരങ്ങളിലായിട്ടാണ് വിലാപയാത്രയും മറ്റ് പ്രധാന ചടങ്ങുകളും ആസൂത്രണം ചെയ്തിരിക്കുന്നത്. നിലവിൽ ടെഹ്റാനിൽ എത്തിച്ചിട്ടുള്ള ഭൗതികശരീരത്തിൽ അന്ത്യോപചാരം അർപ്പിക്കാൻ വിദേശ പ്രതിനിധികൾ ഉൾപ്പെടെ കോടിക്കണക്കിന് ആളുകൾ എത്തുമെന്നാണ് ഔദ്യോഗിക കണക്കുകൂട്ടൽ.
യു.എ.ഇ.യും ഇന്ത്യയും തമ്മിലുള്ള ഉഭയകക്ഷിബന്ധം കൂടുതൽ ദൃഢമാക്കും: റാസൽഖൈമ ഭരണാധികാരിയും ഇന്ത്യൻ സ്ഥാനപതിയും കൂടിക്കാഴ്ച നടത്തി
ഖമനേയിയുടെ ഭൗതികശരീരം ടെഹ്റാനിലെ പ്രധാന ചടങ്ങുകൾ നടക്കുന്ന ഗ്രാൻഡ് മൊസല്ലയിൽ മൂന്ന് ദിവസം പൊതുദർശനത്തിന് വെക്കും. ഖമനേയിക്കൊപ്പം ആക്രമണത്തിൽ കൊല്ലപ്പെട്ട അദ്ദേഹത്തിന്റെ ബന്ധുക്കളുടെ മൃതദേഹങ്ങളും ഇവിടെ പ്രദർശിപ്പിക്കുന്നുണ്ട്. ടെഹ്റാനിലെ ചടങ്ങുകൾക്ക് ശേഷം മൃതദേഹം ഷിയാ മുസ്ലീങ്ങളുടെ പുണ്യനഗരങ്ങളായ നജാഫ്, കർബല എന്നിവിടങ്ങളിലേക്ക് കൊണ്ടുപോകും. തുടർന്ന് ജൂലൈ ഒമ്പതിന് വടക്കുകിഴക്കൻ ഇറാനിലെ അദ്ദേഹത്തിന്റെ ജന്മനാടായ മഷാദിലെ ഇമാം റെസ തീർത്ഥാടന കേന്ദ്രത്തിലാണ് ഖബറടക്കം നിശ്ചയിച്ചിരിക്കുന്നത്.
ഇസ്ലാം മതവിശ്വാസപ്രകാരം മരണം നടന്ന് മാസങ്ങൾക്ക് ശേഷം സംസ്കാരം നടത്തുന്നത് തികച്ചും അസാധാരണമാണ്. യുദ്ധം കൊടുമ്പിരിക്കൊണ്ടിരുന്നതിനാലാണ് ഇത്രയും വലിയ കാലതാമസം ഉണ്ടായതെന്നാണ് അധികൃതർ വ്യക്തമാക്കുന്നത്. ഇസ്ലാമിക ആചാരപ്രകാരം മൃതദേഹത്തിൽ രാസവസ്തുക്കൾ ഉപയോഗിച്ചുള്ള ‘എംബാമിങ്’ അനുവദനീയമല്ലാത്തതിനാൽ, മതപരമായ നിയമങ്ങൾ പാലിച്ച് പ്രത്യേക ശീതീകരിച്ച അറയിലാണ് (Cold Storage) ഇത്രയും നാൾ മൃതദേഹം സൂക്ഷിച്ചിരുന്നത്. അസാധാരണ സാഹചര്യങ്ങളിൽ മൃതദേഹം തണുപ്പിച്ചു സൂക്ഷിക്കാൻ ഷിയാ നിയമം അനുവദിക്കുന്നുണ്ടെന്ന് കൗണ്ടർ ടെററിസം വിദഗ്ധരും സാക്ഷ്യപ്പെടുത്തുന്നു.
പി.ഒ.കെയിൽ പ്രതിഷേധം ശക്തമാകുന്നു ; അമൻ ഖാന്റെ ഇന്ത്യയോടുള്ള സഹായ അഭ്യർത്ഥന ചർച്ചയാകുന്നു
ആഗോളതലത്തിൽ ഷിയാ മുസ്ലീങ്ങൾക്കിടയിൽ വലിയ സ്വാധീനമുണ്ടായിരുന്ന നേതാവായിരുന്നു 86-ാം വയസ്സിൽ കൊല്ലപ്പെട്ട ഖമനേയി. അദ്ദേഹത്തിന്റെ സംസ്കാര ചടങ്ങിൽ പങ്കെടുക്കാൻ വിവിധ രാജ്യങ്ങളിൽ നിന്നുള്ള ഉന്നത പ്രതിനിധികൾ എത്തും. ഭാരതത്തെ പ്രതിനിധീകരിച്ച് ബിഹാർ ഗവർണർ സയ്യിദ് അത്താ ഹസ്നൈൻ, വിദേശകാര്യ സഹമന്ത്രി പബിത്ര മർഗരിറ്റ എന്നിവർ ചടങ്ങിൽ പങ്കെടുക്കും. പാകിസ്താൻ പ്രധാനമന്ത്രി ഷെഹ്ബാസ് ഷെരീഫും ചൈന, അഫ്ഗാനിസ്ഥാൻ തുടങ്ങിയ അയൽരാജ്യങ്ങളിലെ പ്രത്യേക പ്രതിനിധികളും സംസ്കാര ചടങ്ങുകളിൽ പങ്കാളികളാകും.
ഖമനേയിയുടെ മരണത്തിന് ശേഷം അദ്ദേഹത്തിന്റെ മകൻ മൊജ്തബ ഖമനേയി ഇറാന്റെ പുതിയ പരമോന്നത നേതാവിന്റ ചുമതലയേൽക്കുന്ന നിർണ്ണായക ഘട്ടത്തിലാണ് ഈ ചടങ്ങുകൾ നടക്കുന്നത്. പിതാവ് കൊല്ലപ്പെട്ട ആക്രമണത്തിൽ പരിക്കേറ്റ മൊജ്തബ, സുരക്ഷാ ഭീഷണികൾ നിലനിൽക്കുന്നതിനാൽ ചടങ്ങുകളിൽ നേരിട്ട് പങ്കെടുത്തേക്കില്ലെന്നും സൂചനകളുണ്ട്. നിലവിലെ സാമ്പത്തിക പ്രതിസന്ധിയും ഭരണകൂട വിരുദ്ധ വികാരവും മറികടക്കാൻ ഈ വിലാപയാത്രയെ ഒരു ജനകീയ ഹിതപരിശോധനയാക്കി മാറ്റാനാണ് ഇറാൻ ശ്രമിക്കുന്നത്. ചടങ്ങുകളിൽ ജനങ്ങൾ വൻതോതിൽ പങ്കെടുക്കണമെന്ന് പ്രസിഡന്റ് മസൂദ് പെസെഷ്കിയാനും പാർലമെന്റ് സ്പീക്കറും അഭ്യർത്ഥിച്ചിട്ടുണ്ട്.
എന്നാൽ, മുൻ നേതാവ് ആയത്തുള്ള റുഹൊള്ള ഖൊമേനിയുടെ മരണസമയത്ത് രാജ്യം സാക്ഷ്യം വഹിച്ച വൈകാരികമായ ജനക്കൂട്ടത്തിൽ നിന്നും വ്യത്യസ്തമായി, കടുത്ത ആഭ്യന്തര നിയന്ത്രണങ്ങൾക്കിടയിലും നിശബ്ദവും പിരിമുറുക്കം നിറഞ്ഞതുമായ അന്തരീക്ഷമാണ് ഇപ്പോൾ ഇറാനിൽ നിലനിൽക്കുന്നത് എന്നാണ് അന്താരാഷ്ട്ര നിരീക്ഷകർ വിലയിരുത്തുന്നത്.
