ഡാലസ്: 2026 ഫിഫ ലോകകപ്പിൽ നിലവിലെ ചാമ്പ്യന്മാരായ അർജന്റീനയെ വിജയിപ്പിക്കാൻ ഫിഫയും റഫറിമാരും വഴിവിട്ട് സഹായിക്കുന്നുവെന്ന ആരോപണങ്ങൾ പരിശീലകൻ ലയണൽ സ്കലോനി പൂർണ്ണമായി തള്ളി. സ്വിറ്റ്സർലൻഡുമായുള്ള നിർണായക ക്വാർട്ടർ ഫൈനൽ പോരാട്ടത്തിന് മുന്നോടിയായി നടത്തിയ വാർത്താസമ്മേളനത്തിലാണ് അദ്ദേഹം വിമർശകർക്കെതിരെ പ്രതികരിച്ചത്. തങ്ങൾ വീണ്ടും ലോകകിരീടം ചൂടുന്നത് കാണാൻ ആഗ്രഹിക്കാത്തവരാണ് ഇത്തരം അടിസ്ഥാനരഹിതമായ കഥകൾ ചമയ്ക്കുന്നതെന്ന് അദ്ദേഹം വ്യക്തമാക്കി.
മറഡോണയുടെ ധിക്കാരം മുതൽ മെസിയുടെ പ്രതാപം വരെ; എന്തുകൊണ്ട് അർജന്റീന ലോകത്തിന്റെ പ്രിയപ്പെട്ട ‘വില്ലൻ’ ടീമായി?
റൗണ്ട് ഓഫ് 16-ൽ ഈജിപ്തിനെതിരെ അർജന്റീന നേടിയ നാടകീയമായ 3-2 വിജയത്തിന് ശേഷമാണ് ഈ വിവാദങ്ങൾ ഉയർന്നത്. മത്സരത്തിൽ രണ്ട് ഗോളുകൾക്ക് പിന്നിലായ ശേഷമാണ് അർജന്റീന ശക്തമായി തിരിച്ചുവന്നത്. എന്നാൽ കളിയിൽ ഈജിപ്തിന്റെ ഒരു ഗോൾ ‘വാർ’ (VAR) പരിശോധനയിലൂടെ റദ്ദാക്കിയതുൾപ്പെടെയുള്ള റഫറിയുടെ തീരുമാനങ്ങൾ വലിയ തർക്കങ്ങൾക്ക് വഴിവെച്ചു. മത്സരത്തിലെ റഫറിമാർ അർജന്റീനയുടെ സമ്മർദ്ദത്തിന് വഴങ്ങിയെന്ന് ആരോപിച്ച് ഈജിപ്ഷ്യൻ സോക്കർ ഫെഡറേഷൻ ഫിഫയ്ക്ക് ഔദ്യോഗികമായി പരാതി നൽകുകയും ചെയ്തിട്ടുണ്ട്.
തന്റെ ടീമിന്റെ സത്യസന്ധതയെ പ്രതിരോധിച്ച സ്കലോനി, അർജന്റീനയ്ക്ക് നേരെ ഉയരുന്ന ഇത്തരം ആരോപണങ്ങൾക്ക് പതിറ്റാണ്ടുകളുടെ പഴക്കമുണ്ടെന്ന് ഓർമ്മിപ്പിച്ചു. 1986-ൽ ഡീഗോ മറഡോണയുടെ നേതൃത്വത്തിൽ അർജന്റീന കപ്പടിച്ചപ്പോഴും സമാനമായ ആക്ഷേപങ്ങൾ ആളുകൾ ഉന്നയിച്ചിരുന്നുവെന്ന് അദ്ദേഹം ചൂണ്ടിക്കാട്ടി. ഫിഫ അർജന്റീനയെ സഹായിക്കുന്നുവെന്ന വാദങ്ങൾ വെറും ചർച്ചകൾ മാത്രമാണെന്നും, ഈ ടൂർണമെന്റിൽ ഈജിപ്തിനെതിരെയുള്ള മത്സരം ഉൾപ്പെടെ ലിയോണൽ മെസിക്ക് രണ്ട് പ്രധാന പെനാൽറ്റികൾ ലക്ഷ്യത്തിലെത്തിക്കാൻ കഴിഞ്ഞിരുന്നില്ലെന്നും ഫുട്ബോൾ നിരീക്ഷകർ വിലയിരുത്തുന്നു.
ലോകകപ്പ് കളിച്ച ദക്ഷിണാഫ്രിക്കൻ താരം മരണപ്പെട്ടതെങ്ങനെ? എന്താവും മരണകാരണം?
