വന്ദേമാതരവും ഇനി ദേശീയഗാന പദവിയിൽ; ബിൽ ലോക്സഭയും പാസാക്കി, “ജനങ്ങളെ ഭിന്നിപ്പിക്കുന്നു” എന്ന് കനിമൊഴി ; ആലാപനം മനഃപൂർവം തടസ്സപ്പെടുത്തിയാൽ മൂന്ന് വർഷം വരെ തടവ്!

ദേശീയ ഗാനമായ ‘ജനഗണമന’യ്ക്ക് ലഭിക്കുന്ന അതേ നിയമപരമായ പരിരക്ഷ ‘വന്ദേമാതര’ത്തിനും നൽകുന്ന Prevention of Insults to National Honour (Amendment) Bill, 2026 ലോക്സഭയും പാസാക്കി. ഇതോടെ ബില്ലിന് പാർലമെന്റിന്റെ ഇരുസഭകളുടെയും അംഗീകാരം ലഭിച്ചു. രാഷ്ട്രപതിയുടെ അംഗീകാരം ലഭിക്കുന്നതോടെ ബിൽ നിയമമാകും.

കേന്ദ്ര ആഭ്യന്തര സഹമന്ത്രി നിത്യാനന്ദ് റായിയാണ് 1971ലെ ദേശീയ ബഹുമതി നിയമം കൂടുതൽ ഭേദഗതി ചെയ്യുന്ന ബിൽ ലോക്സഭയിൽ അവതരിപ്പിച്ചത്. ബിൽ പ്രകാരമുള്ള കുറ്റങ്ങൾക്ക് പരമാവധി മൂന്ന് വർഷം വരെ തടവോ പിഴയോ അല്ലെങ്കിൽ രണ്ടും ചേർന്ന ശിക്ഷയോ ലഭിക്കും.

ബില്ലിന്മേലുള്ള ചർച്ചയ്ക്ക് മറുപടി പറയവേ, ഇത് കേവലം ഒരു നിയമ ഭേദഗതി മാത്രമല്ല, ഇന്ത്യയുടെ സാംസ്കാരിക പൈതൃകത്തെയും ദേശീയ ബോധത്തെയും രാജ്യത്തിന്റെ സ്വാതന്ത്ര്യസമര ആദർശങ്ങളെയും പ്രതിനിധീകരിക്കുന്നതാണ് ഇതെന്ന് മന്ത്രി വ്യക്തമാക്കി. 1971ൽ ദേശീയ ബഹുമതി നിയമത്തിലൂടെ ദേശീയഗാനത്തോടുള്ള ബഹുമാനം ഉറപ്പാക്കാൻ വ്യവസ്ഥകൾ കൊണ്ടുവന്നിരുന്നെന്നും, ‘വന്ദേമാതരം’ വെറുമൊരു ഗാനമല്ല, രാജ്യത്തിന്റെ ആത്മാവിന്റെ ശബ്ദമാണെന്നും അദ്ദേഹം പറഞ്ഞു.

രാജ്യത്തിന്റെ സ്വാതന്ത്ര്യസമര സേനാനികൾക്ക് പ്രചോദനത്തിന്റെ ഉറവിടമായിരുന്നു വന്ദേമാതരം എന്നും റായ് കൂട്ടിച്ചേർത്തു. 1947 ഓഗസ്റ്റ് 15ന്, ആദ്യത്തെ സ്വാതന്ത്ര്യദിനത്തിന്റെ തുടക്കം കുറിക്കാൻ രാവിലെ 6.30ന് ഓൾ ഇന്ത്യ റേഡിയോയിൽ പണ്ഡിറ്റ് ഓംകാർനാഥ് താക്കൂറിനോട് സമ്പൂർണ്ണ വന്ദേമാതരം ആലപിക്കാൻ സർദാർ വല്ലഭായ് പട്ടേൽ ആവശ്യപ്പെട്ടിരുന്നു എന്ന ചരിത്ര സംഭവം മന്ത്രി ഓർമിപ്പിച്ചു. ഈ ബില്ലിലൂടെ ഐക്യം, ബഹുമാനം, രാജ്യത്തിന്റെ സ്വാതന്ത്ര്യസമര പൈതൃകം എന്നിവയുടെ ആദർശങ്ങൾ കൂടുതൽ ശക്തിപ്പെടുത്തുമെന്നും അദ്ദേഹം പറഞ്ഞു.

ചർച്ചയിൽ നേരത്തെ പങ്കെടുത്ത ഡിഎംകെ എംപി കനിമൊഴി ബില്ലിനെ ശക്തമായി എതിർത്തു. ബിൽ രാജ്യത്തുടനീളമുള്ള ജനങ്ങളെ ഭിന്നിപ്പിക്കുന്നു എന്നായിരുന്നു അവരുടെ പ്രധാന വിമർശനം.

ബിജെപി എംപി സാംബിത് പത്ര ബില്ലിനെ പിന്തുണച്ച് രംഗത്തെത്തി. ഈ നിയമനിർമാണം വളരെ പ്രധാനപ്പെട്ടതാണെന്ന് അദ്ദേഹം പറഞ്ഞു. കഴിഞ്ഞ നവംബർ മുതൽ ദേശീയ ഗീതമായ വന്ദേമാതരത്തിന്റെ 150-ാം വാർഷികം അടയാളപ്പെടുത്തി ഒരു വർഷം നീണ്ട ദേശീയ അനുസ്മരണ പരിപാടികൾ കേന്ദ്ര സർക്കാർ നടത്തിവരികയാണെന്നും, ഈ ബില്ലിലൂടെ നരേന്ദ്ര മോദി സർക്കാർ ദേശീയ ഗീതത്തിന് നിയമപരമായ പരിരക്ഷ നൽകുകയാണെന്നും പത്ര പറഞ്ഞു.

രാജ്യസഭ ജൂലൈ 29ന് ബിൽ പാസാക്കിയിരുന്നു. ഇപ്പോൾ ലോക്സഭയും അംഗീകാരം നൽകിയതോടെ, ബിൽ രാഷ്ട്രപതിയുടെ അംഗീകാരത്തിനായി അയക്കും. അത് ലഭിക്കുന്നതോടെ ‘വന്ദേമാതരം’ ആലപിക്കുന്നതിനിടെ മനഃപൂർവം തടസ്സം സൃഷ്ടിക്കുന്നതിനും അപമാനിക്കുന്നതിനും ശിക്ഷാനടപടികൾ ബാധകമാകും. നിലവിൽ മൂന്ന് വർഷം തടവ് ആണ് ശിക്ഷ.