ഗൂഢാലോചനയും അശ്ലീല പരാമർ‌ശവും ഉറപ്പിച്ചു’; അൻസിബയുടെ ഹർജി ഫയലിൽ സ്വീകരിച്ച് ഹൈക്കോടതി; ലക്ഷ്മിപ്രിയ, ശ്വേതാ മേനോൻ കേസിൽ സർക്കാരിനും പോലീസിനും നോട്ടീസ്

കൊച്ചി: നടി അൻസിബ ഹസൻ നൽകിയ ഹർജിയിൽ ഹൈക്കോടതിയുടെ ഇടപെടൽ. നടി ലക്ഷ്മിപ്രിയയ്ക്കും, ശ്വേതാ മേനോനുമെതിരായ പരാതിയിൽ കേസെടുക്കാനാവില്ലെന്ന എറണാകുളം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയുടെ ഉത്തരവ് ചോദ്യം ചെയ്താണ് അൻസിബ ഹൈക്കോടതിയെ സമീപിച്ചത്. ഹർജി ഫയലിൽ സ്വീകരിച്ച ഹൈക്കോടതി, കേസിൽ എതിർകക്ഷികളായ പാലാരിവട്ടം എസ്.എച്ച്.ഒ, കൊച്ചി സിറ്റി പൊലീസ് കമ്മിഷണർ, സംസ്ഥാന സർക്കാർ എന്നിവർക്ക് നോട്ടീസ് അയയ്ക്കാൻ ഉത്തരവിട്ടു. കേസ് ഒരാഴ്ചയ്ക്ക് ശേഷം വീണ്ടും പരിഗണിക്കും.

യൂട്യൂബ് ചാനലിലൂടെ തന്റെ വ്യക്തിഹത്യ ലക്ഷ്യമിട്ട് അപകീർത്തികരവും അശ്ലീലവുമായ പരാമർശങ്ങൾ നടത്തിയെന്നാണ് അൻസിബയുടെ ആരോപണം. ഇതുസംബന്ധിച്ച പരാതിയിൽ എഫ്.ഐ.ആർ രജിസ്റ്റർ ചെയ്യാൻ പൊലീസ് തയ്യാറായില്ലെന്നും, തുടർന്ന് മജിസ്ട്രേറ്റ് കോടതിയെ സമീപിച്ചെങ്കിലും സ്വകാര്യ പരാതിയായി മാത്രം പരിഗണിക്കാൻ കോടതി നിർദേശിച്ചതാണ് ഹൈക്കോടതിയിൽ ചോദ്യം ചെയ്തിരിക്കുന്നത്.

തനിക്കെതിരെ അടിസ്ഥാനരഹിതവും വ്യാജവുമായ ആരോപണങ്ങളാണ് വീഡിയോയിലൂടെ പ്രചരിപ്പിച്ചതെന്നാണ് ഹർജിയിലെ പ്രധാന വാദം. താൻ മദ്യപാനിയാണെന്നും രാത്രി വൈകി ഒരാളെ മുറിയിലേക്ക് വിളിച്ചുവരുത്തിയെന്ന തരത്തിലുള്ള പരാമർശങ്ങൾ തന്റെ വ്യക്തിപരമായ പ്രതിച്ഛായയെ തകർക്കാൻ ലക്ഷ്യമിട്ടുള്ളതാണെന്ന് അൻസിബ ചൂണ്ടിക്കാട്ടുന്നു.

ലക്ഷ്മിപ്രിയയും യൂട്യൂബ് ചാനലിന്റെ ഉടമ ശ്വേതാ മേനോനും ചേർന്നുള്ള ഗൂഢാലോചനയുടെ ഭാഗമായാണ് ഈ പരാമർശങ്ങൾ ഉണ്ടായതെന്നും ഹർജിയിൽ ആരോപിക്കുന്നു. ഇത്തരം ഉള്ളടക്കങ്ങൾക്കെതിരെ നടപടി ആവശ്യപ്പെട്ട് ആദ്യം പാലാരിവട്ടം പോലീസിനും പിന്നീട് കൊച്ചി സിറ്റി പൊലീസ് കമ്മിഷണർക്കും പരാതി നൽകിയിരുന്നെങ്കിലും നടപടിയുണ്ടായില്ലെന്നാണ് അൻസിബയുടെ നിലപാട്.

പരാതിയിൽ എഫ്.ഐ.ആർ രജിസ്റ്റർ ചെയ്യാതെ സ്വകാര്യ പരാതിയായി പരിഗണിച്ച മജിസ്ട്രേറ്റ് കോടതിയുടെ ഉത്തരവ് റദ്ദാക്കണമെന്നും, പൊലീസ് കേസ് രജിസ്റ്റർ ചെയ്ത് അന്വേഷണം നടത്താൻ നിർദേശം നൽകണമെന്നുമാണ് ഹൈക്കോടതിയിൽ സമർപ്പിച്ചിരിക്കുന്ന ഹർജിയിലെ ആവശ്യം.

ഹർജി ഫയലിൽ സ്വീകരിച്ച സാഹചര്യത്തിൽ, കേസിൽ പോലീസിന്റെയും സർക്കാരിന്റെയും വിശദീകരണം ലഭിച്ച ശേഷമായിരിക്കും ഹൈക്കോടതി തുടർനടപടികൾ തീരുമാനിക്കുക.