തമിഴ്നാട്ടിൽ കുട്ടികൾക്ക് ചിക്കൻ ബിരിയാണി, കേരളത്തിൽ മുട്ട പോലും ഔട്ട്! മുട്ടയ്ക്കും അരിക്കും റെക്കോർഡ് വില; സ്വന്തം കീശയിൽ നിന്ന് പണം മുടക്കി അധ്യാപകർ; ഉച്ചഭക്ഷണ പദ്ധതി പ്രതിസന്ധിയിൽ!

കേരളത്തിലെ സ്കൂൾ ഉച്ചഭക്ഷണ പദ്ധതി കടുത്ത സാമ്പത്തിക പ്രതിസന്ധിയിലാണെന്ന് റിപ്പോർട്ടുകൾ. പദ്ധതിക്കുള്ള ഫണ്ട് സമയത്തിന് ലഭിക്കാത്തതിനെ തുടർന്ന്, പല സ്കൂളുകളിലും ഭക്ഷണം മുടങ്ങാതിരിക്കാൻ പ്രധാനാധ്യാപകർ സ്വന്തം കൈയിൽ നിന്ന് പണം മുടക്കേണ്ട ഗതികേടിലാണെന്നാണ് ആരോപണം.

വാണിജ്യ പാചകവാതക സിലിണ്ടറുകളുടെ വില 4,000 രൂപയിലേക്ക് കുതിച്ചുയർന്നതാണ് പ്രതിസന്ധി കൂടുതൽ രൂക്ഷമാക്കിയത്. സർക്കാർ അനുവദിക്കുന്ന തുക ഈ വർധിച്ച ചെലവിന് തികയാത്തതിനാൽ, പ്രധാനാധ്യാപകരും പാചകത്തൊഴിലാളികളും കടുത്ത ബുദ്ധിമുട്ടിലാണ്. ചില സ്കൂളുകൾ ഉയർന്ന വില നൽകി സ്വകാര്യ ഏജൻസികളിൽ നിന്ന് സിലിണ്ടർ വാങ്ങാറുണ്ടെങ്കിലും, ഈ അധിക ചെലവ് ഔദ്യോഗിക കണക്കിൽ കാണിക്കാൻ അനുവാദമില്ലാത്തതിനാൽ ബാക്കി തുക അധ്യാപകർ തന്നെ വഹിക്കേണ്ടി വരുന്നു. കുട്ടികളുടെ എണ്ണം കൂടുന്നതിനനുസരിച്ച് ലഭിക്കുന്ന തുകയുടെ ആനുപാതികമായ ലഭ്യതയും കുറയുന്നുണ്ട്.

എന്നാൽ പൊതുവിദ്യാഭ്യാസ വകുപ്പ് പുറത്തിറക്കിയ 2026-27 വർഷത്തെ പുതിയ മാർഗനിർദേശങ്ങളിൽ ഈ ഗുരുതര പ്രതിസന്ധി പരിഹരിക്കാനുള്ള യാതൊരു പരാമർശവുമില്ലെന്നത് അധ്യാപകർക്കും രക്ഷിതാക്കൾക്കും ഇടയിൽ കടുത്ത പ്രതിഷേധത്തിന് വഴിവെച്ചിട്ടുണ്ട്.

സമാനമായ പ്രശ്നം നേരത്തെ മെനു പരിഷ്കരണത്തിലും കണ്ടു. മുൻ എൽഡിഎഫ് സർക്കാരിന്റെ കാലത്ത് ഫ്രൈഡ് റൈസ്, ബിരിയാണി, മുട്ട തുടങ്ങിയവ ഉൾപ്പെടുത്തി മെനു പരിഷ്കരിച്ചിരുന്നെങ്കിലും, അതിനുള്ള അധിക ഫണ്ട് അനുവദിക്കാതിരുന്നതിനാൽ ഈ പരിഷ്കരണം മിക്ക സ്കൂളുകളിലും നടപ്പിലായതേയില്ല. നിലവിൽ, ഏത് ഭക്ഷണം നൽകണമെന്ന് തീരുമാനിക്കാനുള്ള അധികാരം സ്കൂൾ ഉച്ചഭക്ഷണ കമ്മിറ്റികൾക്ക് വിട്ടുനൽകിയിരിക്കുകയാണ് വിദ്യാഭ്യാസ വകുപ്പ്.

ഫണ്ട് വിതരണത്തിലെ കാലതാമസം ഇത് ആദ്യമായല്ല അധ്യാപകർക്ക് ബാധ്യതയാകുന്നത് – മുൻപും സമാന പ്രതിസന്ധിയിൽ അധ്യാപക സംഘടനകൾ കോടതിയെ സമീപിക്കുകയും, കുടിശിക രണ്ടാഴ്ചയ്ക്കകം നൽകണമെന്ന് ഹൈക്കോടതി നിർദേശിക്കുകയും ചെയ്തിരുന്നു.

ഇതിനിടെ, അയൽ സംസ്ഥാനമായ തമിഴ്നാട്ടിൽ സ്കൂൾ ഉച്ചഭക്ഷണ പദ്ധതി കൂടുതൽ മെച്ചപ്പെടുത്താനുള്ള നീക്കത്തിലാണ് സർക്കാർ. വിദ്യാർത്ഥികളുടെ ഹാജർ നിലയും പോഷകാഹാര ലഭ്യതയും മെച്ചപ്പെടുത്താൻ ആഴ്ചയിലൊരിക്കൽ ചിക്കൻ ബിരിയാണി ഉൾപ്പെടുത്താൻ തമിഴ്നാട് സർക്കാർ ആലോചിക്കുന്നതായി റിപ്പോർട്ടുകളുണ്ട്.