“സച്ചിനാണ് മികച്ച ബാറ്റ്‌സ്മാൻ, എന്നാൽ സാക്ഷാൽ ക്രിക്കറ്റ് ഇതിഹാസം ഇയാളാണ്”; ഞെട്ടിക്കുന്ന വെളിപ്പെടുത്തലുമായി ബ്രെറ്റ് ലീ!

ക്രിക്കറ്റ് ചരിത്രത്തിലെ എക്കാലത്തെയും മികച്ച ബാറ്റ്സ്മാൻ സച്ചിൻ ടെണ്ടുൽക്കറാണെന്ന് ഓസ്ട്രേലിയൻ പേസ് ലെജൻഡ് ബ്രെറ്റ് ലീ. എന്നാൽ സച്ചിനേക്കാൾ മികച്ച ‘ഓൾറൗണ്ട് ക്രിക്കറ്റർ’ ദക്ഷിണാഫ്രിക്കയുടെ ഇതിഹാസ താരം ജാക്സ് കാലിസ് ആണെന്ന് ബ്രെറ്റ് ലീ അഭിപ്രായപ്പെട്ടു. ഒരു പോഡ്കാസ്റ്റിൽ സംസാരിക്കവെയാണ് താരം തന്റെ നിലപാട് വ്യക്തമാക്കിയത്.

സച്ചിൻ ടെണ്ടുൽക്കറുടെ ബാറ്റിങ് മികവിനെ ലീ പ്രശംസിച്ചെങ്കിലും, ബാറ്റിങ്ങിനും ബോളിങ്ങിനും പുറമെ ഫീൽഡിങ്ങിലും ഒരുപോലെ തിളങ്ങാൻ കാലിസിന് കഴിഞ്ഞതാണ് അദ്ദേഹത്തെ മികച്ച ക്രിക്കറ്ററാക്കുന്നത് എന്ന് ലീ ചൂണ്ടിക്കാണിച്ചു. “ഞാൻ എപ്പോഴും പറയാറുണ്ട്, ക്രിക്കറ്റ് ചരിത്രത്തിലെ ഏറ്റവും മികച്ച ബാറ്റ്സ്മാൻ സച്ചിൻ ടെണ്ടുൽക്കറാണ്. എന്നാൽ ഏറ്റവും മികച്ച ക്രിക്കറ്റർ ജാക്സ് കാലിസ് ആണ്. അദ്ദേഹത്തിന്റെ കണക്കുകൾ പരിശോധിച്ചാൽ അറിയാം, സ്റ്റാറ്റിസ്റ്റിക്സ് ഒരിക്കലും കള്ളം പറയില്ല,” ബ്രെറ്റ് ലീ പറഞ്ഞു.

ഐപിഎല്ലിൽ കൊൽക്കത്ത നൈറ്റ് റൈഡേഴ്സിനായി ഒരേ ടീമിൽ കളിച്ചപ്പോഴുള്ള അനുഭവങ്ങളും ബ്രെറ്റ് ലീ പങ്കുവെച്ചു. മത്സരത്തിന് ഇറങ്ങുന്നതിന് തൊട്ടുമുമ്പ് പോലും ജാക്സ് കാലിസ് കാണിക്കുന്ന ശാന്തത തന്നെ അത്ഭുതപ്പെടുത്തിയിട്ടുണ്ടെന്ന് അദ്ദേഹം പറഞ്ഞു. ബാറ്റ് ചെയ്യാൻ ക്രീസിലേക്ക് പോകുമ്പോൾ അദ്ദേഹത്തിന്റെ ഹൃദയമിടിപ്പ് മിനിറ്റിൽ 30 beats മാത്രമായിരിക്കും എന്ന് തോന്നും അത്രത്തോളം കൂളായാണ് അദ്ദേഹം തയ്യാറെടുക്കുന്നത് എന്നും ലീ കൂട്ടിച്ചേർത്തു.

ടെസ്റ്റ് ക്രിക്കറ്റ് 45 സെഞ്ച്വറികൾ സഹിതം 13,289 റൺസും, 292 വിക്കറ്റുകളും, 200 ക്യാച്ചുകളും കാലിസ് സ്വന്തമാക്കിയിട്ടുണ്ട്. ഏകദിന ക്രിക്കറ്റിൽ 17 സെഞ്ച്വറികൾ ഉൾപ്പെടെ 11,579 റൺസും, 31.79 ശരാശരിയിൽ 273 വിക്കറ്റുകളും അദ്ദേഹം നേടിയിട്ടുണ്ട്. ബാറ്റിങ്ങിലും ബോളിങ്ങിലും ഒരുപോലെ റെക്കോർഡുകൾ സൃഷ്ടിച്ച കാലിസാണ് ക്രിക്കറ്റ് കണ്ട എക്കാലത്തെയും മികച്ച സമ്പൂർണ്ണ താരം എന്നാണ് ബ്രെറ്റ് ലീയുടെ പക്ഷം.