യുഎസിൽ പഠിച്ച് ജോലി ചെയ്യണോ? ഇനി 95 ലക്ഷം രൂപ വേണ്ടിവരും; ട്രംപിന്റെ പുതിയ ഒപിടി ഫീസ് പദ്ധതി ഇന്ത്യൻ വിദ്യാർത്ഥികൾക്ക് ഇരുട്ടടി; ഇത് വല്ലാത്ത ചതി തന്നെ!

യുഎസിൽനിന്നൊരു ഡിഗ്രി, ശേഷം അവിടെത്തന്നെ ജോലി – ഈ സ്വപ്നം കാണുന്ന ഇന്ത്യൻ വിദ്യാർത്ഥികൾക്ക് ഇനി കഠിനാധ്വാനം മാത്രം പോരാ, ഒരു ലക്ഷം ഡോളർ (ഏകദേശം 95 ലക്ഷം രൂപ) കൂടി കണ്ടെത്തേണ്ടി വന്നേക്കും. ബിരുദത്തിനു ശേഷം യുഎസിൽത്തന്നെ ജോലി ചെയ്യാൻ ആഗ്രഹിക്കുന്ന വിദേശ വിദ്യാർത്ഥികൾക്ക് ട്രംപ് ഭരണകൂടം ഏർപ്പെടുത്താൻ ആലോചിക്കുന്ന ഫീസാണിത്. വിദേശ വിദ്യാർത്ഥികൾക്കായുള്ള ഓപ്ഷണൽ പ്രാക്ടിക്കൽ ട്രെയിനിങ് (ഒപിടി) എന്ന വർക്ക് പെർമിറ്റ് പ്രോഗ്രാമിന് ഈ ഫീസ് ഏർപ്പെടുത്താൻ യുഎസ് ആലോചിക്കുന്നതായി വാൾ സ്ട്രീറ്റ് ജേണൽ റിപ്പോർട്ട് ചെയ്തു. ഇക്കാര്യത്തിൽ വൈറ്റ് ഹൗസ് ഔദ്യോഗികമായി പ്രതികരിച്ചിട്ടില്ല; നിർദേശം ഇപ്പോഴും ചർച്ചാഘട്ടത്തിലാണ്.

നിലവിൽ യുഎസിൽ ബിരുദ പഠനത്തിനെത്തുന്ന വിദേശ വിദ്യാർത്ഥികൾക്ക് പഠനം കഴിഞ്ഞ് ഒരു വർഷം വരെ മറ്റ് വീസകളില്ലാതെ ജോലി ചെയ്യാൻ ഒപിടി അനുവദിക്കുന്നുണ്ട്. സയൻസ്, സാങ്കേതികവിദ്യ, എൻജിനീയറിങ്, ഗണിതം (STEM) തുടങ്ങിയ മേഖലകളിലെ വിദ്യാർത്ഥികൾക്ക് മൂന്ന് വർഷം വരെയും ജോലി ചെയ്യാം. ഈ കാലയളവിനു ശേഷം മാത്രമേ എച്ച്1ബി വീസയുടെ ആവശ്യം വരുന്നുള്ളൂ. 2024ലെ കണക്ക് പ്രകാരം ഏകദേശം 4,19,000 വിദേശ ബിരുദധാരികളാണ് ഒപിടി പ്രോഗ്രാം വഴി യുഎസിൽ ജോലി ചെയ്യുന്നത്.

പുതിയ പദ്ധതി പ്രകാരം, ഒപിടി ലഭിക്കാൻ വിദ്യാർത്ഥികൾക്ക് ഒരു ലക്ഷം ഡോളർ നൽകേണ്ടി വരും. ഭൂരിഭാഗം ഇന്ത്യൻ കുടുംബങ്ങൾക്കും ഇത് ബാലികേറാമലയാണ്. ഈ ഫീസ് വിദ്യാർത്ഥികൾ തന്നെ നൽകണോ അതോ സർവകലാശാലകളും തൊഴിലുടമകളും വഹിക്കണോ എന്ന കാര്യത്തിൽ ഇപ്പോഴും വ്യക്തതയില്ല.

നേരത്തെ, പുതിയ എച്ച്1ബി വീസ അപേക്ഷകർക്കും യുഎസ് ഒരു ലക്ഷം ഡോളർ ഫീസ് ഏർപ്പെടുത്തിയിരുന്നു. ഇത് ഇന്ത്യൻ പ്രഫഷണലുകൾക്ക് വൻ തിരിച്ചടിയായിരുന്നു – യുഎസിലെ നാലിൽ മൂന്ന് എച്ച്1ബി വീസക്കാരും ഇന്ത്യൻ വംശജരാണ്. എന്നാൽ ജൂലൈ 24ന് ബോസ്റ്റണിലെ ഫസ്റ്റ് സർക്യൂട്ട് ഫെഡറൽ അപ്പീൽ കോടതി ഈ എച്ച്1ബി ഫീസ് പുനഃസ്ഥാപിക്കാനുള്ള സർക്കാർ അപേക്ഷ തള്ളി, ജൂൺ 8ന് ജഡ്ജി ലിയോ സൊറോക്കിൻ നൽകിയ വിധി ശരിവെച്ചു – ഈ ഫീസ് കോൺഗ്രസ് അംഗീകരിക്കാത്ത നിയമവിരുദ്ധ നികുതിയാണെന്നായിരുന്നു കോടതി കണ്ടെത്തൽ.

ഈ കോടതി തിരിച്ചടിക്ക് അഞ്ച് ദിവസത്തിന് ശേഷമാണ് ഒപിടിക്ക് സമാന ഫീസ് ഏർപ്പെടുത്താനുള്ള പുതിയ നിർദേശം വരുന്നത് – അതേ ലക്ഷ്യം നേടാനുള്ള കുറുക്കുവഴിയായാണ് ഇതിനെ വിദഗ്ധർ വിലയിരുത്തുന്നത്. ഒപിടി ദുരുപയോഗം ചെയ്യാതിരിക്കാനും വിസത്തട്ടിപ്പ് തടയാനും കഴിവുറ്റവരെ തിരഞ്ഞെടുക്കാനുമാണ് ഫീസ് ഏർപ്പെടുത്തുന്നതെന്നാണ് യുഎസ് ഉദ്യോഗസ്ഥരുടെ വിശദീകരണം. ഗ്രീൻ കാർഡ് അപേക്ഷകർക്ക് ഒരു ലക്ഷം ഡോളർ റീഫണ്ടബിൾ ബോണ്ട് ഏർപ്പെടുത്തുന്ന കാര്യവും യുഎസ് സ്റ്റേറ്റ് ഡിപ്പാർട്ട്മെന്റ് പരിഗണിക്കുന്നതായി റിപ്പോർട്ടുകളുണ്ട്.

ഈ പദ്ധതി നടപ്പിലായാൽ അമേരിക്കൻ സമ്പദ്‌വ്യവസ്ഥയ്ക്ക് പ്രതിവർഷം 481 ബില്യൺ ഡോളറിന്റെ നഷ്ടം സംഭവിക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ഇത് വിദേശ തൊഴിലാളികളെ നിയന്ത്രിക്കുക മാത്രമല്ല, തദ്ദേശീയ വിദ്യാർത്ഥികളുടെ ട്യൂഷൻ ഫീസ് വർധിപ്പിക്കുകയും ചെയ്യുമെന്നാണ് വിലയിരുത്തൽ.

ഓപ്പൺ ഡോർസ് റിപ്പോർട്ട് പ്രകാരം, 2024-25ൽ 3.63 ലക്ഷം ഇന്ത്യൻ വിദ്യാർത്ഥികളാണ് യുഎസിലെ വിവിധ സ്ഥാപനങ്ങളിലായി പഠനത്തിന് ചേർന്നിട്ടുള്ളത്. യുഎസിൽ പഠിക്കുന്ന വിദേശ വിദ്യാർത്ഥികളിൽ ഏറ്റവും കൂടുതൽപ്പേരും ഇന്ത്യയിൽ നിന്നാണ്, അതിനാൽ ഈ പുതിയ ഫീസ് നടപ്പിലായാൽ ഏറ്റവും കൂടുതൽ ബാധിക്കപ്പെടുന്നതും ഇന്ത്യൻ വിദ്യാർത്ഥികളാകും.