ജയിലിൽ കിടന്ന് സത്യപ്രതിജ്ഞ, ഇപ്പോൾ 6 മാസം അവധിയും; ഇത് സുഗതനെ രക്ഷിക്കാനുള്ള ബിജെപി കുതന്ത്രമോ? ; മേയർ തിരഞ്ഞെടുപ്പ് റദ്ദാക്കണമെന്ന് സിപിഎം കോടതിയിൽ!

തിരുവനന്തപുരം കോർപ്പറേഷനിലെ മേയർ, ഡെപ്യൂട്ടി മേയർ തിരഞ്ഞെടുപ്പുകൾ റദ്ദാക്കണമെന്ന ആവശ്യവുമായി സിപിഎം രംഗത്ത്. വിഷയത്തിൽ പാർലമെന്ററി പാർട്ടി ലീഡർ എസ്.പി ദീപക് ഹൈക്കോടതിയിൽ ഹർജി നൽകി. ഹൈക്കോടതി സത്യപ്രതിജ്ഞ അസാധുവാക്കിയ കൗൺസിലർമാരാണ് മേയർ തിരഞ്ഞെടുപ്പിൽ വോട്ട് ചെയ്തതെന്നും ഇത് നിയമപരമായി നിലനിൽക്കില്ലെന്നുമാണ് ഹർജിയിലെ വാദം. അധികാരമില്ലാത്ത ബിജെപി കൗൺസിലർമാർ വോട്ട് ചെയ്തത് മുനിസിപ്പൽ ആക്ടിന് വിരുദ്ധമാണെന്നും ഹർജിയിലുണ്ട്. തിരഞ്ഞെടുപ്പ് കമ്മിഷനും 20 ബിജെപി കൗൺസിലർമാർക്കും ഹൈക്കോടതി നോട്ടീസ് അയച്ചു; മൂന്നാഴ്‌ചയ്ക്കകം മറുപടി നൽകാനാണ് നിർദേശം.

ഇഷ്ട ദേവീദേവന്മാരുടെയും ബലിദാനികളുടെയും പേരിൽ ചെയ്ത സത്യപ്രതിജ്ഞ ജൂൺ 24ന് ഹൈക്കോടതി അസാധുവാക്കിയതിന് പിന്നാലെ, തിരുവനന്തപുരം കോർപറേഷനിലെ ബിജെപി കൗൺസിലർമാർ നാല് ആഴ്ചയ്ക്കകം (ജൂലൈ 14നകം) വീണ്ടും സത്യപ്രതിജ്ഞ ചെയ്യണമെന്ന് കോടതി നിർദേശിച്ചിരുന്നു. ഡെപ്യൂട്ടി മേയർ ആശാനാഥ് അടക്കം 19 പേർ ജൂൺ 25ന് തന്നെ വീണ്ടും സത്യപ്രതിജ്ഞ ചെയ്തു.

എന്നാൽ കാപ്പ ചുമത്തപ്പെട്ട് കരുതൽ തടങ്കലിൽ കഴിയുന്ന കൗൺസിലർ ആർ. സുഗതന് ബാക്കിയുള്ളവർക്കൊപ്പം ചേരാൻ കഴിഞ്ഞില്ല. കോടതി നിശ്ചയിച്ച സമയപരിധിക്കുള്ളിൽ, ജൂലൈ 14ന് വിയ്യൂർ സെൻട്രൽ ജയിലിനുള്ളിൽ വെച്ചാണ് സുഗതൻ രണ്ടാം തവണയും കൗൺസിലറായി സത്യപ്രതിജ്ഞ ചെയ്തത്. ഒരു ജനപ്രതിനിധി ജയിലിൽ വെച്ച് സത്യപ്രതിജ്ഞ ചെയ്തത് കേരള ചരിത്രത്തിൽ ആദ്യമാണ്. തിരുവനന്തപുരം കോർപ്പറേഷൻ മേയർ വി.വി രാജേഷായിരുന്നു സത്യവാചകം ചൊല്ലിക്കൊടുത്തത്; ദൈവനാമത്തിലായിരുന്നു ഈ സത്യപ്രതിജ്ഞയും.

101 അംഗ കൗൺസിലിൽ വെറും 50 സീറ്റും ഒരു സ്വതന്ത്രന്റെ പിന്തുണയും മാത്രമുള്ള ബിജെപിക്ക്, സുഗതന്റെ സീറ്റ് നഷ്ടമായാൽ ഭൂരിപക്ഷം തന്നെ ഇല്ലാതാകും. കേരള മുനിസിപ്പാലിറ്റി ആക്ട് സെക്ഷൻ 91(കെ) പ്രകാരം, തുടർച്ചയായി മൂന്ന് മാസം കൗൺസിൽ യോഗങ്ങളിൽ പങ്കെടുക്കാതിരുന്നാൽ അംഗത്വം അസാധുവാകും. കാപ്പ പ്രകാരം ഡിസംബർ വരെയെങ്കിലും സുഗതൻ ജയിലിൽ തുടരാൻ സാധ്യതയുള്ളതിനാൽ, ഈ അയോഗ്യതാ ഭീഷണി ഒഴിവാക്കാനാണ് അദ്ദേഹത്തിന് ഇപ്പോൾ കൗൺസിൽ ആറ് മാസത്തെ അവധി അനുവദിച്ചത്. രണ്ട് സ്വതന്ത്രരും മേയറും പിന്തുണച്ചതോടെ 51 പേരാണ് ഈ അവധി അപേക്ഷ അംഗീകരിച്ചത്.

സുഗതന്റെ കാര്യം ചർച്ച ചെയ്യാൻ പ്രത്യേക കൗൺസിൽ യോഗം വിളിക്കണമെന്ന പ്രതിപക്ഷ ആവശ്യം ബിജെപി ഏറെക്കാലം അവഗണിച്ചിരുന്നു. എൽഡിഎഫിന്റെയും യുഡിഎഫിന്റെയും ശക്തമായ പ്രതിഷേധത്തിനൊടുവിൽ, 47 ദിവസത്തെ ഇടവേളയ്ക്ക് ശേഷം ജൂലൈ 29നാണ് മേയർ വി.വി രാജേഷ് കൗൺസിൽ യോഗം വിളിച്ചുചേർത്തത്. ഹാജർ രജിസ്റ്ററിന്റെ പേരിൽ കൗൺസിലർമാർ തമ്മിൽ കയ്യാങ്കളി വരെ ഈ യോഗത്തിൽ അരങ്ങേറിയിരുന്നു.

40 വർഷത്തെ എൽഡിഎഫ് ഭരണത്തിന് അന്ത്യം കുറിച്ച് അധികാരത്തിലേറിയ ബിജെപിക്ക്, മാലിന്യ സംസ്കരണം, തെരുവുനായ നിയന്ത്രണം തുടങ്ങിയ പ്രധാന വാഗ്ദാനങ്ങളൊന്നും നടപ്പാക്കാൻ കഴിഞ്ഞിട്ടില്ലെന്നും, സുഗതനെ സംരക്ഷിക്കുകയാണ് പാർട്ടിയുടെ മുൻഗണനയെന്നും പ്രതിപക്ഷം ആരോപിക്കുന്നു.