അഹമ്മദാബാദ് : 2008-ലെ അഹമ്മദാബാദ് സ്ഫോടനപരമ്പരക്കേസിൽ 38 പ്രതികളുടെ വധശിക്ഷ ഗുജറാത്ത് ഹൈക്കോടതി ഔദ്യോഗികമായി ശരിവെച്ചു. പ്രത്യേക വിചാരണക്കോടതി നേരത്തെ വിധിച്ച വധശിക്ഷാ വിധി ജസ്റ്റിസുമാരായ എ. വൈ. കോഗ്ജെ, എസ്. ജെ. ദവെ എന്നിവരടങ്ങിയ ഹൈക്കോടതി ഡിവിഷൻ ബെഞ്ച് അംഗീകരിക്കുകയായിരുന്നു. വധശിക്ഷയ്ക്ക് പുറമെ, കേസിൽ കുറ്റക്കാരാണെന്ന് കണ്ടെത്തിയ മറ്റ് 11 പ്രതികളുടെ ജീവപര്യന്തം തടവുശിക്ഷയും ഹൈക്കോടതി നിലനിർത്തിയിട്ടുണ്ട്.
കുരുന്നുകളുടെ ജീവനെടുത്ത റെയിൽ ദുരന്തം; സ്കൂൾ വാനിൽ ട്രെയിൻ പാഞ്ഞുകയറി, നാല് പേർക്ക് ദാരുണാന്ത്യം
ഈ കേസിൽ ശിക്ഷിക്കപ്പെട്ടവരിൽ കേരളത്തിൽ നിന്നുള്ള നാല് മലയാളികളും ഉൾപ്പെടുന്നു. കോട്ടയം ഈരാറ്റുപേട്ട പീടികയ്ക്കൽ അബ്ദുൽ കരീമിന്റെ മക്കളായ ഷിബിലി (47), ശാദുലി (45) എന്നിവർക്കും, മലപ്പുറം കൊണ്ടോട്ടി സ്വദേശി സൈനുദ്ദീന്റെ മകൻ ഇ. ടി. ഷറഫുദ്ദീൻ (43) എന്നിവർക്കുമാണ് ഗുജറാത്ത് ഹൈക്കോടതി വധശിക്ഷ ശരിവെച്ചത്. കേസിൽ ഉൾപ്പെട്ട നാലാമത്തെ മലയാളിയായ ആലുവ കുഞ്ഞുണ്ണിക്കര പെരുന്തള്ളി സ്വദേശി മുഹമ്മദ് അൻസാറിന് (45) ജീവപര്യന്തം തടവുശിക്ഷയാണ് കോടതി വിധിച്ചിരിക്കുന്നത്.
2008 ജൂലൈ 26-നാണ് അഹമ്മദാബാദ് നഗരത്തെ നടുക്കിയ 21 തുടരൻ ബോംബ് സ്ഫോടനങ്ങൾ നടന്നത്. വെറും 70 മിനിറ്റുകൾക്കുള്ളിൽ ജനങ്ങൾ ജനസാന്ദ്രതയുള്ള പ്രദേശങ്ങളിലും ആശുപത്രികളിലും നടത്തിയ ഈ ഭീകരാക്രമണത്തിൽ 56 പേർ കൊല്ലപ്പെടുകയും 240-ലധികം പേർക്ക് ഗുരുതരമായി പരിക്കേൽക്കുകയും ചെയ്തിരുന്നു. നിരോധിത സംഘടനയായ സിമിയുടെ സജീവ പ്രവർത്തകരായിരുന്ന പ്രതികൾ രാജ്യത്തിനെതിരെ യുദ്ധം പ്രഖ്യാപിക്കൽ, ഗൂഢാലോചന, ഭീകരവാദ പ്രവർത്തനം തുടങ്ങിയ ഗുരുതരമായ കുറ്റങ്ങളാണ് ചെയ്തതെന്ന് കോടതി കണ്ടെത്തി.
ടിവികെ സർക്കാരിനെ വീഴ്ത്താൻ 35 കോടിയുടെ ‘ഓഫർ’; തമിഴ്നാട്ടിൽ വൻ രാഷ്ട്രീയ ഗൂഢാലോചന, മൂന്ന് പേർ പിടിയിൽ!
സ്ഫോടനത്തിൽ ഇരകളായവർക്ക് വലിയ തുക നഷ്ടപരിഹാരം നൽകാനും ഗുജറാത്ത് ഹൈക്കോടതി സർക്കാരിനോട് നിർദ്ദേശിച്ചിട്ടുണ്ട്. ആക്രമണത്തിൽ മരണപ്പെട്ടവരുടെ ആശ്രിതർക്ക് 10 ലക്ഷം രൂപ വീതവും, ഗുരുതരമായി പരിക്കേറ്റവർക്ക് 5 ലക്ഷം രൂപ വീതവും, നിസാര പരുക്കേറ്റവർക്ക് 1 ലക്ഷം രൂപയും നഷ്ടപരിഹാരം നൽകണം. ഈ തുക മുഴുവൻ 2027 മാർച്ച് 31-നകം ഇരകളുടെ കുടുംബങ്ങൾക്ക് കൈമാറണമെന്നാണ് കോടതി ഉത്തരവിട്ടിട്ടുള്ളത്. ഹൈക്കോടതിയും വധശിക്ഷ ശരിവെച്ച സാഹചര്യത്തിൽ, ഈ വിധിക്കെതിരെ സുപ്രീം കോടതിയെ സമീപിക്കാനാണ് പ്രതിഭാഗത്തിന്റെ തീരുമാനം.
