തിരുവനന്തപുരം: ഒട്ടേറെ പ്രതിസന്ധികളെയും രാഷ്ട്രീയ കലുഷിതമായ സാഹചര്യങ്ങളെയും സ്വന്തം വ്യക്തിത്വവും നിശ്ചയദാര്ഢ്യവും കൊണ്ട് അതിജീവിച്ച മുതിര്ന്ന ഐ.പി.എസ് ഉദ്യോഗസ്ഥന് നിഥിന് അഗര്വാള് 37 വര്ഷത്തെ സമാനതകളില്ലാത്ത സര്വീസിന് ശേഷം പടികളിറങ്ങുന്നു. ആര്ക്കും വഴങ്ങാത്ത, തനിക്ക് ശരിയെന്ന് തോന്നുന്ന കാര്യങ്ങള് ആരുടെയും മുഖത്ത് നോക്കി തുറന്നുപറയുന്ന അസാമാന്യ ധൈര്യശാലിയായ ഉദ്യോഗസ്ഥനായിരുന്നു അദ്ദേഹം. ഐ.പി.എസ് അസോസിയേഷന് സംഘടിപ്പിച്ച യാത്രയയപ്പ് സമ്മേളനത്തില് സ്വന്തം നിലപാടുകളും മനസ്സിലെ തുറന്നുപറച്ചിലുകളും കൊണ്ട് വിടവാങ്ങല് പ്രസംഗം പോലും അദ്ദേഹം ചരിത്രമാക്കി മാറ്റി.
‘ഞാന് ആളുകളുടെ മുഖത്ത് നോക്കി കാര്യം പറയും. പറഞ്ഞു കഴിഞ്ഞാല് പിന്നെ ഒന്നും മനസ്സില് വയ്ക്കില്ല. അങ്ങനെയൊരു പെരുമാറ്റരീതിയാണ് എന്റേത്. എന്റെ വാക്കുകലാല് പലര്ക്കും മനസ്സിന് മുറിവേറ്റിട്ടുണ്ടാകാം. പക്ഷേ, കാര്യം പറഞ്ഞു കഴിഞ്ഞാല് എന്നില് പകയുണ്ടാകില്ല; എന്നാല് പലരുടെയും കാര്യത്തില് അതങ്ങനെയല്ല,’ – യാത്രയയപ്പ് വേദിയില് സന്നിഹിതരായവരെ സാക്ഷിനിര്ത്തി ഡി.ജി.പി നിഥിന് അഗര്വാള് പറഞ്ഞ ഈ വാക്കുകളില് അദ്ദേഹത്തിന്റെ സര്വീസ് ജീവിതത്തിലെ മുഴുവന് നേര്ക്കാഴ്ചകളും അടങ്ങിയിരുന്നു. കൈയ്യടിയോടെയാണ് ഐപിഎസുകാര് ആ പ്രസംഗത്തെ നെഞ്ചിലേറ്റിയത്.
കേരള പോലീസിലും കേന്ദ്ര ഡെപ്യൂട്ടേഷനിലും നിര്ണ്ണായക ചുമതലകള് വഹിച്ച നിഥിന് അഗര്വാള് രാജ്യം കണ്ട ഏറ്റവും മികച്ച ഐ.പി.എസ് ഉദ്യോഗസ്ഥരില് ഒരാളായാണ് വിലയിരുത്തപ്പെടുന്നത്. ഏറ്റവും കൂടുതല് കാലം രാജ്യത്തെ സേവിച്ച ഐ.പി.എസ് ഉദ്യോഗസ്ഥനായ രമണ് ശ്രീവാസ്തവയ്ക്ക് (37രണ്ടര വര്ഷം) തൊട്ടുപിന്നാലെ, കൃത്യം 37 വര്ഷത്തെ ദീര്ഘമായ സര്വീസുമായാണ് നിഥിന് അഗര്വാള് പോലീസ് പടിയിറങ്ങുന്നത്. ബി.എസ്.എഫ് (ബോര്ഡര് സെക്യൂരിറ്റി ഫോഴ്സ്) ഡയറക്ടര് ജനറലായിരിക്കെ ഇന്ത്യ-പാക് അതിര്ത്തിയില് പാകിസ്ഥാനെ വിറപ്പിച്ച കണിശക്കാരനായ മേധാവിയായിരുന്നു അദ്ദേഹം.
എന്നാല്, കേന്ദ്ര ആഭ്യന്തരമന്ത്രി അമിത് ഷായെപ്പോലുള്ള അതിശക്തരായ ഭരണാധികാരികളുടെ മുന്നില്പ്പോലും അനീതിക്കെതിരെ ശബ്ദമുയര്ത്താനും സ്വന്തം നിലപാടുകളില് ഉറച്ചുനില്ക്കാനും അദ്ദേഹം മടി കാണിച്ചില്ല. തനിക്ക് ശരിയല്ലെന്ന് തോന്നുന്ന കാര്യങ്ങളില് വിട്ടുവീഴ്ച ചെയ്യാതിരുന്നതാണ് ബി.എസ്.എഫിലെ താക്കോല് സ്ഥാനത്തുനിന്നും അദ്ദേഹത്തെ മാറ്റുന്നതിലേക്ക് നയിച്ചത്. കേന്ദ്രം ഡെപ്യൂട്ടേഷന് റദ്ദാക്കി അദ്ദേഹത്തെ മാതൃ കേഡറായ കേരളത്തിലേക്ക് തിരിച്ചയക്കുകയായിരുന്നു.
സീനിയോറിറ്റിയില് ഏറേ മുന്നിലായിരുന്നിട്ടും, കേരള പോലീസിന്റെ അമരക്കാരനായി ഡി.ജി.പി പദവിയില് നിഥിന് അഗര്വാളിനെ വാഴിക്കാന് പിണറായി വിജയന് സര്ക്കാര് തയ്യാറാകാതിരുന്നത് വലിയ രാഷ്ട്രീയ-ഭരണതല ചര്ച്ചകള്ക്ക് വഴിതുറന്നിരുന്നു. കപ്പിനും ചുണ്ടിനുമിടയിലാണ് അദ്ദേഹത്തിന് സംസ്ഥാന പോലീസ് മേധാവി പദം നഷ്ടമായത്. കണ്ണൂരില് എ.എസ്.പി ആയിരുന്ന കാലത്ത് അദ്ദേഹം കാണിച്ച സമാനതകളില്ലാത്ത ധീരതയും ക്രമസമാധാന പാലനവുമായിരുന്നു ഇതിന് പ്രധാന കാരണമെന്ന് വിലയിരുത്തപ്പെടുന്നു.
വര്ഷങ്ങള്ക്ക് മുന്പ് കണ്ണൂര് റേഞ്ചിലെ ഒരു മുതിര്ന്ന പോലീസ് ഉദ്യോഗസ്ഥനെ സമരക്കാര് വളഞ്ഞുവെച്ച് ആക്രമിച്ച സംഭവം നടന്നു. ആ നിര്ണ്ണായക നിമിഷത്തില് ജീവന് പോലും പണയം വെച്ച് മുന്നില് നിന്ന് ആക്ഷനിറങ്ങിയത് യുവ ഐ.പി.എസ് ഓഫീസറായിരുന്ന നിഥിന് അഗര്വാളായിരുന്നു. അന്ന് കണ്ണൂരില് അദ്ദേഹം നടത്തിയ ശക്തമായ ലാത്തിച്ചാര്ജ്ജ് കൊണ്ട് മാത്രമാണ് ആ മുതിര്ന്ന ഉദ്യോഗസ്ഥന് അക്രമികളില് നിന്ന് രക്ഷപ്പെട്ടത്. എന്നാല് ആ സംഭവത്തിന്റെ പക രാഷ്ട്രീയക്കാരുടെയും ചില ഉന്നതരുടെയും മനസ്സില് എന്നും ശേഷിച്ചിരുന്നു.
വര്ഷങ്ങള്ക്ക് ശേഷവും ആ പഴയ പക കാരണം നിഥിന് അഗര്വാളിന് പോലീസ് മേധാവിയാകാനുള്ള അവസരം തടയപ്പെട്ടു. അദ്ദേഹത്തിന് താഴെ ജൂനിയര്മാരായ ഷെയ്ഖ് ദര്വേശ് സാഹിബും റവാഡാ ചന്ദ്രശേഖറും സംസ്ഥാന പോലീസിന്റെ പരമോന്നത പദവിയിലേക്ക് ഉയര്ന്നപ്പോഴും, നിഥിന് അഗര്വാള് യാതൊരു പരാതിയുമില്ലാതെ തന്റെ കര്ത്തവ്യം തുടര്ന്നു. അനീതിയോട് വിട്ടുവീഴ്ച ചെയ്യാത്ത ആ സ്വഭാവമഹിമ തന്നെയാണ് അദ്ദേഹത്തെ സര്വീസില് വേറിട്ടുനിര്ത്തിയത്.
1989 ബാച്ച് കേരള കേഡര് ഐ.പി.എസ് ഉദ്യോഗസ്ഥനാണ് നിഥിന് അഗര്വാള്. ബി.ടെക്, എം.ടെക് ബിരുദധാരിയായ അദ്ദേഹം സാങ്കേതിക വിദ്യയെ പോലീസിംഗുമായി ബന്ധിപ്പിക്കുന്നതില് വലിയ പങ്കുവഹിച്ചു. കേരളത്തില് സര്വീസ് ആരംഭിച്ച കാലം മുതല് കുറ്റാന്വേഷണത്തിലും ക്രമസമാധാന പാലനത്തിലും നിഷ്പക്ഷമായ നിലപാടുകളാണ് അദ്ദേഹം കൈക്കൊണ്ടത്.
കേന്ദ്ര സര്വീസില് ശാസ്ത്രീയ അതിര്ത്തി സംരക്ഷണവും നവീകരണവും നടപ്പിലാക്കാന് അദ്ദേഹത്തിന് സാധിച്ചു. ബി.എസ്.എഫ് മേധാവിയായിരിക്കെ അതിര്ത്തി കടന്നുള്ള ഭീകരവാദത്തിനെതിരെയും മയക്കുമരുന്ന് കടത്തിനെതിരെയും കടുത്ത നിലപാടുകളാണ് അദ്ദേഹം സ്വീകരിച്ചത്. ബി.എസ്.എഫിലെയും ഇന്തോ-ടിബറ്റന് ബോര്ഡര് പോലീസിലെയും (ഐ.ടി.ബി.പി) സേവനം അദ്ദേഹത്തെ ദേശീയതലത്തില് തന്നെ പ്രശസ്തനാക്കി.
പോലീസ് തലപ്പത്തെ രാഷ്ട്രീയ ഇടപെടലുകള്ക്കും വടംവലികള്ക്കുമിടയിലും സ്വന്തം നട്ടെല്ല് വളയ്ക്കാന് തയ്യാറാകാതിരുന്ന ഈ ഉദ്യോഗസ്ഥന്റെ പടിയിറക്കം കേരള പോലീസിന് വലിയൊരു നഷ്ടം തന്നെയാണ്. തനിക്കെതിരെ പ്രവര്ത്തിച്ചവരോടും അനീതി കാട്ടിയവരോടും യാത്രയയപ്പ് വേദിയിലും യാതൊരു വേദനയുമില്ലാതെ സംസാരിച്ച അദ്ദേഹം, ഒരു യഥാര്ത്ഥ ഓഫീസര് എങ്ങനെയായിരിക്കണം എന്നതിന്റെ ഉത്തമ മാതൃകയായാണ് പടിയിറങ്ങുന്നത്.
37 വര്ഷത്തെ നീണ്ട സേവനത്തിന് ശേഷം ഔദ്യോഗിക ജീവിതത്തോട് വിടപറയുമ്പോഴും, ആരുടെയും മുന്നില് തലകുനിക്കാത്ത ആ പഴയ എ.എസ്.പിയുടെയും ബി.എസ്.എഫ് ഡയറക്ടര് ജനറലിന്റെയും ഗാംഭീര്യം നിഥിന് അഗര്വാള് എന്ന ഉദ്യോഗസ്ഥനില് അതേപടി ശേഷിക്കുന്നുണ്ട്. സത്യസന്ധതയ്ക്കും നിര്ഭയത്വത്തിനും കൊടുത്ത വലിയ വിലയായിരുന്നു അദ്ദേഹത്തിന്റെ കരിയറെങ്കിലും, ജനങ്ങളുടെയും സഹപ്രവര്ത്തകരുടെയും മനസ്സില് ഒരു നായകന്റെ സ്ഥാനത്തോടെയാണ് അദ്ദേഹം പടിയിറങ്ങുന്നത്
Disclaimer:
“The images and content displayed on this website are used for news reporting, informational, and editorial purposes. Some images, videos, and media may be sourced from external platforms such as Google Images, Instagram, Facebook, X (Twitter), news agencies, official sources, and other publicly available internet sources. We do not claim ownership of third-party content unless explicitly stated.”
വീണ സേവനമൊന്നും നല്കിയിട്ടില്ല; പണം നല്കിയത് പിണറായിയുമായുള്ള അടുപ്പത്തിന്റെ പേരില്; പിണറായിക്കും വീണയ്ക്കും കുരുക്കായി കർത്തയുടെ മൊഴി
