തിരുവനന്തപുരം/കൊച്ചി: ഒളിവിലിരുന്ന് പോലീസിനെയും സര്ക്കാരിനെയും നിരന്തരം വെല്ലുവിളിക്കുന്ന ഗുണ്ടാ നേതാവ് അര്ജുന് ആയങ്കിയെ പിടികൂടാന് അന്വേഷണ സംഘം വലമുറുക്കുന്നു. തൃശൂരില് നിന്നും കടല്മാര്ഗ്ഗം മംഗലാപുരത്തേക്ക് ആയങ്കി കടന്നെന്ന സംശയത്തിലാണ് പോലീസ് അന്വേഷണം വ്യാപിപ്പിച്ചിരിക്കുന്നത്. കരമാര്ഗ്ഗം വഴിയുള്ള തെരച്ചില് ശക്തമാക്കിയതിനിടെ, മംഗലാപുരത്തെ അധോലോക മാഫിയയുടെ സഹായത്തോടെ അര്ജുന് ആയങ്കിയെ ബോട്ട് മാര്ഗ്ഗം കടലിലൂടെ കൊണ്ടുപോയതാണോ എന്ന കാര്യവും അന്വേഷണ സംഘം സജീവമായി പരിശോധിച്ചുവരികയാണ്.
പോലീസിനെയും ആഭ്യന്തര വകുപ്പിനെയും നാണംകെടുത്തുന്ന രീതിയില് ഒളിവിലിരുന്ന് സോഷ്യല് മീഡിയ വഴി നിരന്തരം വെല്ലുവിളികള് നടത്തുന്ന അര്ജുന് ആയങ്കിയെ എത്രയും വേഗം പിടികൂടാന് ആഭ്യന്തരമന്ത്രി രമേശ് ചെന്നിത്തല പോലീസ് മേധാവിക്ക് 24 മണിക്കൂറിന്റെ കടുത്ത അന്ത്യശാസനം നല്കിയിരിക്കുകയാണ്. പോലീസിന്റെ വീഴ്ചകളെ രൂക്ഷമായി വിമര്ശിച്ച ചെന്നിത്തല, കുപ്രസിദ്ധ കുറ്റവാളിയെ ഏതുവിധേനയും വലയിലാക്കാന് പ്രത്യേക സംഘത്തിന് നിര്ദ്ദേശം നല്കി. ഒളിവിലിരുന്ന് പോലീസിനെതിരെ ഭീഷണി മുഴക്കുന്ന ആയങ്കിയെ വെടിവെയ്ക്കാന് ഉത്തരവ് നല്കിയിട്ടില്ലെന്നും, റൗഡികള് പലതും പറയും, അതൊന്നും തങ്ങള് ഗൗനിക്കുന്നില്ലെന്നും മന്ത്രി പ്രതികരിച്ചു.
ആലുവ റൂറല് എസ്.പി. സുദര്ശനന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് നിലവില് ആയങ്കിക്കായുള്ള വേട്ടയ്ക്ക് മേല്നോട്ടം വഹിക്കുന്നത്. എന്നാല്, പ്രതി വിദേശത്തേക്കോ മറ്റ് സംസ്ഥാനങ്ങളിലേക്കോ കടക്കാന് സാധ്യതയുള്ളതിനാല്, ഹൈടെക് കുറ്റകൃത്യങ്ങളും ഗുണ്ടാ വേട്ടകളും കൈകാര്യം ചെയ്ത് പരിചയസമ്പന്നനായ മുതിര്ന്ന പോലീസ് ഉദ്യോഗസ്ഥന് ഷൗക്കത്തലിയെയും ഈ അന്വേഷണ സംഘത്തിലേക്ക് നിയോഗിച്ചേക്കുമെന്നാണ് വിവരങ്ങള്. ഷൗക്കത്തലിയുടെ സാന്നിധ്യം കൂടി എത്തുന്നതോടെ അന്വേഷണത്തിന് വേഗം കൂടുമെന്നാണ് കരുതുന്നത്. കോഴിക്കോട് കമ്മീഷണറാണ് ഷൗക്കത്തലി. ആയങ്ക മലബാറിലേക്ക് കടക്കുമെന്ന വിലയിരുത്തലിലാണ് ഇതെല്ലാം.
മൊബൈല് ടവര് ലൊക്കേഷനുകള് കേന്ദ്രീകരിച്ചും ആയങ്കിയുടെ ഡിജിറ്റല് സാന്നിധ്യവും പിന്തുടര്ന്നുമാണ് പോലീസ് നിലവില് തെരച്ചില് നടത്തുന്നത്. ഏതെങ്കിലും സ്റ്റേഷനില് പോയി കീഴടങ്ങാന് ഇയാളെ ഒരു കാരണവശാലും അനുവദിക്കരുതെന്നും, പോലീസ് തന്നെ നേരിട്ട് പോയി അറസ്റ്റ് ചെയ്യണമെന്നുമാണ് നിലവിലെ കര്ശന നിര്ദ്ദേശം. അതിനാല് തന്നെ സംസ്ഥാനത്തെ എല്ലാ പോലീസ് സ്റ്റേഷനുകളിലും പ്രത്യേക ജാഗ്രതാ നിര്ദ്ദേശം നല്കിയിട്ടുണ്ട്. ഇന്നും നാളെയും പൊതുഅവധിയായതിനാല് ആയങ്കിക്ക് സാധാരണ കോടതിയില് നേരിട്ടെത്തി കീഴടങ്ങാന് കഴിയില്ല. എന്നാല് ഏതെങ്കിലും മജിസ്ട്രേറ്റിന്റെയോ ജഡ്ജിമാരുടെയോ വീടുകളിലെത്തി ഇയാള് പെട്ടെന്ന് കീഴടങ്ങാന് സാധ്യതയുണ്ടെന്ന ആശങ്ക പോലീസിനുണ്ട്. ഇത്തരമൊരു നീക്കം ഉണ്ടായാല് അതിനെ തടയാന് മജിസ്ട്രേറ്റ് വസതികള്ക്ക് മുന്നിലും പോലീസ് രഹസ്യ നിരീക്ഷണം ഏര്പ്പെടുത്തിയിട്ടുണ്ട്.
സാമ്പത്തിക മാഫിയകളുടെയും സ്വര്ണ്ണക്കടത്ത് സംഘങ്ങളുടെയും സംരക്ഷണം അര്ജുന് ആയങ്കിക്ക് ലഭിക്കുന്നുണ്ടെന്നാണ് നിഗമനം. ഏതുവിധേനയും 24 മണിക്കൂറിനുള്ളില് അര്ജുന് ആയങ്കിയെ പിടികൂടി നിയമത്തിന് മുന്നില് കൊണ്ടുവരുമെന്നും, ഒളിവില് കഴിയാന് സഹായിച്ചവര്ക്കെതിരെയും കര്ശന നടപടിയുണ്ടാകുമെന്നും അന്വേഷണ സംഘത്തലവന്മാര് വ്യക്തമാക്കിയിട്ടുണ്ട്.
പാലിയേക്കര ടോള് പ്ലാസ കടന്നതായി സിസിടിവി ദൃശ്യങ്ങളില് കണ്ടതിനെ തുടര്ന്ന് അര്ജുന് ആയങ്കി തൃശൂരില് ഉണ്ടാകാമെന്നാണ് ആദ്യഘട്ടത്തില് കരുതപ്പെട്ടിരുന്നത്. എന്നാല് തൃശൂരിലെ തീരദേശ മേഖലയില് നിന്ന് മത്സ്യബന്ധന ബോട്ട് വഴി മംഗലാപുരത്തെ അധോലോക സംഘങ്ങളുടെ സഹായത്തോടെ ഇയാള് സുരക്ഷിത താവളത്തിലേക്ക് മാറിയെന്ന സംശയവും ശക്തമാണ്. ഇതിനായി കര്ണ്ണാടക പോലീസുമായി കേരള പോലീസ് വിവരങ്ങള് പങ്കുവെച്ചിട്ടുണ്ട്. അര്ജുന് ആയങ്കിക്കെതിരെ ആലുവ സൈബര് പോലീസ് വീണ്ടും പുതിയ എഫ്.ഐ.ആര് രജിസ്റ്റര് ചെയ്തിട്ടുണ്ട്. മുഖ്യമന്ത്രിയെ പൊതുമധ്യത്തില് അപമാനിച്ചതിനാണ് ഈ നടപടി. നിരവധി കേസുകളില് പ്രതിയായ ഇയാളെ പിടികൂടാന് വൈകുന്നതില് പോലീസിനെതിരെ ജനരോഷവും ശക്തമാണ്.
ഒളിവിലിരുന്നുകൊണ്ട് സോഷ്യല് മീഡിയയിലൂടെ പോലീസിനും സിസ്റ്റത്തിനും എതിരെ വെല്ലുവിളികള് ഉയര്ത്തുന്നത് ആയങ്കി ഇപ്പോഴും തുടരുകയാണ്. ‘തങ്ങളെ തീവ്രവാദിയാക്കിയത് സിസ്റ്റമാണെന്നും മുട്ടിന് താഴെ വെടിവെച്ചാലും മുട്ടുകുത്തില്ല’ എന്നുമാണ് വെള്ളിയാഴ്ച രാത്രിയും ഇയാള് പുതിയ ഫേസ്ബുക്ക് പോസ്റ്റിലൂടെ അവകാശപ്പെട്ടത്. ഇയാള് തന്നെയാണോ അതോ പുറത്തുനിന്നുള്ള മറ്റാരെങ്കിലും ഇയാളുടെ അക്കൗണ്ടുകള് ഉപയോഗിച്ച് കുറിപ്പുകള് പോസ്റ്റ് ചെയ്യുന്നതാണോ എന്നും പോലീസ് പരിശോധിക്കുന്നുണ്ട്.
അര്ദ്ധരാത്രി 12 മണിക്കും പുലര്ച്ചെ നാലുമണിക്കും ആയങ്കി സോഷ്യല് മീഡിയയില് സജീവമായിരുന്നു. ജനം ടിവിയിലെ മുതിര്ന്ന മാധ്യമപ്രവര്ത്തകന് അനില് നമ്പ്യാരെയും ഭാര്യയെയും വ്യക്തിപരമായും ലൈംഗികമായും ആക്ഷേപിച്ചുകൊണ്ട് പോസ്റ്റ് ചെയ്ത കമന്റുകള് വലിയ വിവാദമായിട്ടുണ്ട്. മാധ്യമപ്രവര്ത്തകര്ക്ക് നേരെ ഇത്തരത്തില് വൃത്തികെട്ട ഭാഷയില് പ്രതികരിക്കുന്നത് ഇയാളുടെ സാന്നിധ്യം ഉറപ്പാക്കാന് സൈബര് സെല്ലിന് കൂടുതല് സഹായകരമാകുന്നുണ്ട്.
Disclaimer:
“The images and content displayed on this website are used for news reporting, informational, and editorial purposes. Some images, videos, and media may be sourced from external platforms such as Google Images, Instagram, Facebook, X (Twitter), news agencies, official sources, and other publicly available internet sources. We do not claim ownership of third-party content unless explicitly stated.”
നിതിൻ രാജിന്റെ മരണത്തിൽ അന്വേഷണം നിർണായക ഘട്ടത്തിൽ; മുഖ്യപ്രതി ഡോ. എം.കെ. റാം അറസ്റ്റിൽ
