കൊല്ലം: കരുനാഗപ്പള്ളിയില് നടന്ന കുപ്രസിദ്ധ ഗുണ്ട അലുവ അതുല് വധക്കേസിലെ അതിവേഗ അന്വേഷണ മികവിനും, സാങ്കേതികവിദ്യ ഫലപ്രദമായി ഉപയോഗിച്ച് മണിക്കൂറുകള്ക്കുള്ളില് പ്രതികളെ മുഴുവന് പിടികൂടിയതിനും കൊല്ലം സിറ്റി പോലീസ് കമ്മീഷണര് എം. ഹേമലത ഐ.പി.എസിനും അന്വേഷണ സംഘത്തിനും പ്രത്യേക ആദരം. ഈ മാസം 31-ന് നടക്കുന്ന സംസ്ഥാന ക്രൈം കോണ്ഫറന്സില് വെച്ച് അന്വേഷണ സംഘത്തിന് ഗുഡ് സര്വീസ് എന്ട്രിയും കമ്മന്ഡേഷന് ലെറ്ററും കൈമാറും.
തന്റെ കീഴിലുള്ള പോലീസ് സേനയെ കൃത്യമായി ഏകോപിപ്പിച്ച്, കുറ്റവാളികള്ക്ക് ഒരു തരി പോലും വിട്ടുവീഴ്ച നല്കാതെ കൊല്ലം ജില്ലയെ സ്വന്തം ‘ഇല്ലം’ പോലെ സുരക്ഷിതമായി കാത്തുസൂക്ഷിക്കുന്ന ഹേമലത ഐ.പി.എസിന്റെ നേതൃത്വത്തിലുള്ള ഈ കടുത്ത ഇടപെടല് കേരള പോലീസിന് തന്നെ വലിയ അഭിമാനമായി മാറുകയാണ്.
കൊല്ലം നഗരത്തില് ക്രമസമാധാനത്തിന് ഭീഷണിയുയര്ത്താന് ശ്രമിച്ച ഗുണ്ടാ-മയക്കുമരുന്ന് മാഫിയകളെ അടിച്ചമര്ത്തി ജില്ലയിലെ ക്രമസമാധാനം കാത്തുസൂക്ഷിക്കുന്ന കൊല്ലം സിറ്റി പോലീസ് കമ്മീഷണര് എം. ഹേമലത ഐ.പി.എസ്. വീണ്ടും വാര്ത്തകളില് നിറയുകയാണ്.
എന്ജിനീയറിംഗ് ബിരുദം പൂര്ത്തിയാക്കിയ ശേഷം സിവില് സര്വീസ് നേടി പോലീസിലെത്തിയ ഹേമലത ഐ.പി.എസ്., കേരള പോലീസിലെ പ്രമുഖ വനിതാ ഉദ്യോഗസ്ഥരില് മുന്നിരയിലാണ്. ഔദ്യോഗിക ജീവിതത്തിലുടനീളം വിട്ടുവീഴ്ചയില്ലാത്ത നിലപാടുകളിലൂടെയും ക്രിമിനലുകള്ക്കെതിരായ കടുത്ത നടപടികളിലൂടെയും ‘ലേഡി സിംഗം’ എന്ന പേര് നേടിയെടുത്ത ഉദ്യോഗസ്ഥയാണ് അവര്.
കരുനാഗപ്പള്ളി പുതിയാകാവില് ദേശീയപാതയില് വെച്ച് കുപ്രസിദ്ധ ഗുണ്ട അലുവ അതുല് കൊല്ലപ്പെട്ട സംഭവം സംസ്ഥാനത്തെ തന്നെ ഞെട്ടിച്ച ഒന്നായിരുന്നു. ജിം സന്തോഷ് വധക്കേസില് ജാമ്യത്തിലിറങ്ങി സ്റ്റേഷനില് ഒപ്പിട്ട് മടങ്ങുകയായിരുന്ന അതുലിനെ പകപോക്കലിന്റെ ഭാഗമായി എതിര് സംഘം നടുറോഡില് വെട്ടിക്കൊല്ലുകയായിരുന്നു. എന്നാല് സംഭവം നടന്ന് വെറും മണിക്കൂറുകള്ക്കുള്ളില് കേസിന്റെ ഗതി തന്നെ മാറ്റിയെഴുതാന് കമ്മീഷണര് ഹേമലതയുടെ നേതൃത്വത്തിലുള്ള പ്രത്യേക അന്വേഷണ സംഘത്തിന് കഴിഞ്ഞു:
മിന്നല് ഓപ്പറേഷന്: എ.എന്.പി.ആര്. ക്യാമറകള് കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിലൂടെയും അയല് ജില്ലകള് കേന്ദ്രീകരിച്ച് നടത്തിയ ചേസിംഗിലൂടെയും മണിക്കൂറുകള്ക്കകം കൊലപാതകത്തില് നേരിട്ട് പങ്കെടുത്ത പ്രധാന പ്രതികള് ഉള്പ്പെടെ 10 പേരെ തമിഴ്നാട്ടില് നിന്നും വിവിധ ജില്ലകളില് നിന്നുമായി പോലീസ് വലയിലാക്കി.
പൂര്ണ്ണമായും നിലച്ച ഗുണ്ടാവാഴ്ച: ഈ കൊലപാതകത്തിന് ശേഷം കൊല്ലത്ത് തിരിച്ചടിയോ തുടര് ഗുണ്ടാ ആക്രമണങ്ങളോ ഉണ്ടാകാന് കമ്മീഷണര് അനുവദിച്ചില്ല. ഗുണ്ടാ സംഘങ്ങളുടെ ഓരോ ചലനവും നിരീക്ഷണത്തിലാക്കി അവരെ പൂര്ണ്ണമായി പൂട്ടാന് കഴിഞ്ഞതാണ് കമ്മീഷണറുടെ വലിയ നേട്ടം.
ഗുണ്ടാ സംഘങ്ങള്ക്ക് പുറമെ കൊല്ലത്തെ മയക്കുമരുന്ന് മാഫിയയുടെയും ലഹരി ശൃംഖലകളുടെയും ഉറക്കം കെടുത്തിയതും ഹേമലത ഐ.പി.എസിന്റെ നേതൃത്വത്തിലുള്ള ‘ഡാന്സാഫ്’ സംഘമാണ്. ജില്ലയിലെ പ്രധാന ലഹരി കടത്ത് സംഘങ്ങളെയും എം.ഡി.എം.എ. വിതരണക്കാരെയും കൃത്യമായ റൈഡുകളിലൂടെ അവര് ജയിലിലടച്ചു.
31-ന് നടക്കുന്ന ക്രൈം കോണ്ഫറന്സില് ലഭിക്കുന്ന ആദരം, കുറ്റവാളികള്ക്കെതിരെ തരിമ്പും വിട്ടുവീഴ്ചയില്ലാതെ പോരാടുന്ന ഈ ഉദ്യോഗസ്ഥയ്ക്കും അവരുടെ സംഘത്തിനും ഔദ്യോഗിക ജീവിതത്തിലെ വലിയൊരു അംഗീകാരമായി മാറും.
Disclaimer:
“The images and content displayed on this website are used for news reporting, informational, and editorial purposes. Some images, videos, and media may be sourced from external platforms such as Google Images, Instagram, Facebook, X (Twitter), news agencies, official sources, and other publicly available internet sources. We do not claim ownership of third-party content unless explicitly stated.”
EXCLUSIVE സംസ്ഥാന ചലച്ചിത്ര അക്കാദമി പുനസംഘടന: നടി പ്രിയങ്കാ നായര് വൈസ് ചെയര്പേഴ്സണാകും; യു.ഡി.എഫ്. സാംസ്കാരിക ചേരിയില് നിന്ന് അക്കാദമി തലപ്പത്തേക്ക്; ഔദ്യോഗിക പ്രഖ്യാപനം ഉടന്
