“എഐ വന്നാലും മനുഷ്യൻ എപ്പോഴും വേണം”; തൊഴിൽ നഷ്ടമല്ല, പുതിയ അവസരങ്ങളെന്ന് ഐടി സെക്രട്ടറി എസ്. കൃഷ്ണൻ, എഐ നിയന്ത്രണ നിയമം വേണമെന്നും സൂചന!

ന്യൂഡൽഹി : നിർമിതബുദ്ധി (എഐ) അതിവേഗം വളരുമ്പോഴും, തീരുമാനങ്ങളിൽ മനുഷ്യൻ എപ്പോഴും ഉൾപ്പെട്ടിരിക്കണമെന്ന് കേന്ദ്ര ഐടി സെക്രട്ടറി എസ്. കൃഷ്ണൻ. എഐ വ്യാപകമായി സ്വീകരിക്കുന്നത് പൂർണമായും തൊഴിൽ നഷ്ടത്തിലേക്ക് നയിക്കില്ലെന്നും അദ്ദേഹം അഭിപ്രായപ്പെട്ടു. മറിച്ച്, ഉയർന്ന നിലവാരത്തിലുള്ളവ ഉൾപ്പെടെ പുതിയ തരം തൊഴിലവസരങ്ങൾ സൃഷ്ടിക്കാൻ എഐയ്ക്ക് സാധ്യതയുണ്ടെന്നും അദ്ദേഹം പറഞ്ഞു.

ന്യൂഡൽഹിയിൽ നടന്ന ഒരു പരിപാടിയിൽ സംസാരിക്കവേ, “എപ്പോഴും ഒരു മനുഷ്യൻ തീരുമാനത്തിന്റെ ഭാഗമായി ഉണ്ടെന്ന് ഉറപ്പാക്കണം. അബദ്ധത്തിൽ എന്തെങ്കിലും തെറ്റ് സംഭവിക്കാതിരിക്കാൻ. അതോടൊപ്പം എഐ ഉപയോഗിക്കുന്നത് ജോലി ചെയ്യുന്ന വ്യക്തിയുടെ കഴിവ് വർധിപ്പിക്കുന്ന രീതിയിലായിരിക്കണം” എന്ന് അദ്ദേഹം വ്യക്തമാക്കി.

അടുത്ത രണ്ട് പതിറ്റാണ്ടിനുള്ളിൽ ഇന്ത്യ വികസിത രാഷ്ട്രമാകാനുള്ള ലക്ഷ്യത്തിൽ എഐയ്ക്ക് നിർണായക പങ്കുവഹിക്കാൻ കഴിയുമെന്ന് തമിഴ്‌നാട് കേഡർ ഐഎഎസ് ഉദ്യോഗസ്ഥനായ കൃഷ്ണൻ അഭിപ്രായപ്പെട്ടു. ഭരണനിർവഹണത്തിൽ ഇന്ത്യ വലിയ പുരോഗതി കൈവരിച്ചിട്ടുണ്ടെങ്കിലും ഇനിയും ഏറെ ചെയ്യാനുണ്ടെന്നും അദ്ദേഹം കൂട്ടിച്ചേർത്തു. പരിമിതമായ മാനവശേഷിയും ഫണ്ടിങ്ങും ഉപയോഗിച്ച് സർക്കാർ സേവനങ്ങൾ കൂടുതൽ മെച്ചപ്പെട്ട രീതിയിൽ നൽകാനുള്ള അവസരമാണ് എഐ നൽകുന്നതെന്നും അദ്ദേഹം വ്യക്തമാക്കി.

‘സോവറിൻ എഐ’ എന്ന പദത്തോട് തനിക്ക് വലിയ താൽപര്യമില്ലെന്നും, പകരം ‘സ്ട്രാറ്റജിക് ഓട്ടോണമി’ (തന്ത്രപര സ്വയംപര്യാപ്തത) എന്ന പദമാണ് കൂടുതൽ അനുയോജ്യമെന്നും കൃഷ്ണൻ അഭിപ്രായപ്പെട്ടു. “ഏതെങ്കിലും ഒരു സ്രോതസ്സിനെയോ ഒരു പ്രത്യേക സ്ഥലത്തെയോ മാത്രം ആശ്രയിക്കാതിരിക്കാൻ നാം ശ്രദ്ധിക്കണം” എന്ന് അദ്ദേഹം പറഞ്ഞു. എല്ലാം സ്വന്തമായി നിർമിക്കുകയല്ല ലക്ഷ്യമെന്നും, മറിച്ച് ഏതെങ്കിലും ഒരു രാജ്യത്തെയോ കമ്പനിയെയോ അമിതമായി ആശ്രയിക്കുന്നത് ഒഴിവാക്കുകയാണ് വേണ്ടതെന്നും അദ്ദേഹം വ്യക്തമാക്കി. വൈവിധ്യവൽക്കരണവും കരുത്തുമുള്ള വിശ്വസനീയമായ വിതരണ ശൃംഖലകൾ കെട്ടിപ്പടുക്കുന്നതിലൂടെ, ആഗോള എഐ ആവാസവ്യവസ്ഥയുമായി സംയോജിക്കുമ്പോൾത്തന്നെ തന്ത്രപരമായ ആശ്രിതത്വം കുറയ്ക്കാൻ ഇന്ത്യയ്ക്ക് കഴിയുമെന്നും അദ്ദേഹം കൂട്ടിച്ചേർത്തു.

ഒരു തലമുറയിൽ ഒരിക്കൽ മാത്രം ലഭിക്കുന്ന അവസരമാണ് എഐ ഇന്ത്യയ്ക്ക് നൽകുന്നതെന്ന് കൃഷ്ണൻ അഭിപ്രായപ്പെട്ടു. ആഭ്യന്തര, ആഗോള വിപണികൾക്കായി അർഥവത്തായ എഐ ആപ്ലിക്കേഷനുകളും പരിഹാരങ്ങളും വികസിപ്പിച്ചാൽ, ലോകത്തിന് വേണ്ടി എഐ നിർമിക്കുന്ന പ്രമുഖ രാജ്യമായി ഇന്ത്യയ്ക്ക് മാറാൻ കഴിയുമെന്നും, ഇത് വികസിത രാഷ്ട്രമെന്ന ലക്ഷ്യത്തിലേക്ക് അടുക്കാൻ സഹായിക്കുമെന്നും അദ്ദേഹം പറഞ്ഞു.

ഇന്ത്യയ്ക്ക് ഒരു എഐ നിയമം ആവശ്യമുണ്ടോ എന്ന ചോദ്യത്തിന്, ഏതെങ്കിലും ഘട്ടത്തിൽ ചില തരത്തിലുള്ള നിയന്ത്രണം അനിവാര്യമായി വരുമെന്ന് കൃഷ്ണൻ പ്രതികരിച്ചു. “ഇപ്പോൾത്തന്നെ അതിനെക്കുറിച്ച് ചിന്തിച്ചു തുടങ്ങേണ്ട സമയമായിരിക്കാം” എന്നും അദ്ദേഹം കൂട്ടിച്ചേർത്തു.