കൊച്ചി: മലയാള സിനിമയിലെ താരസംഘടനയായ ‘അമ്മ’ (AMMA) മാസങ്ങളായി നേരിടുന്ന കടുത്ത പ്രതിസന്ധികള്ക്ക് അന്ത്യം കുറിക്കാന് സംഘടനയ്ക്കുള്ളില് കരുനീക്കങ്ങള് സജീവം. ഭിന്നതകള് അവസാനിപ്പിച്ച് സംഘടനയെ അതിന്റെ പഴയ പ്രതാപത്തിലേക്ക് തിരികെ കൊണ്ടുവരാന് മുതിര്ന്ന താരങ്ങളുടെ നേതൃത്വത്തില് നിര്ണ്ണായക ചര്ച്ചകള് പുരോഗമിക്കുകയാണ്. രാജിവെച്ചു പോയവരെ തിരിച്ചെത്തിക്കുകയും, പുതിയ ഭരണസമിതിയിലേക്ക് സമവായത്തിലൂടെ നേതൃത്വത്തെ കണ്ടെത്തുകയുമാണ് സംഘടനയുടെ അടിയന്തര ലക്ഷ്യം.
പൃഥ്വിരാജും പാർവതിയും ഒന്നിക്കുന്ന ഹീസ്റ്റ് ത്രില്ലർ; ‘ഐ നോബഡി’ ജൂലൈ 9 മുതൽ പ്രേക്ഷകരിലേക്ക്
സംഘടനയില് നിന്ന് വിട്ടുനിന്ന ശ്വേത മേനോന് ഉള്പ്പെടെയുള്ള പ്രമുഖ താരങ്ങള് വൈകാതെ രാജി പിന്വലിച്ച് തിരിച്ചെത്തുമെന്നാണ് പുറത്തുവരുന്ന സൂചനകള്. രമേഷ് പിഷാരടി എം.എല്.എയുടെ നേതൃത്വത്തില് നടന്ന അനുനയ ചര്ച്ചകള് ഫലം കണ്ടുതുടങ്ങിയതായാണ് റിപ്പോര്ട്ട്. അന്സിബ, മല്ലികാ സുകുമാരന് എന്നിവരുമായും ചര്ച്ചകള് ഇതിനകം പൂര്ത്തിയായിട്ടുണ്ട്. എല്ലാവരെയും ഒന്നിച്ച് കൊണ്ടുപോകാനുള്ള ഈ നീക്കത്തിന് മമ്മൂട്ടിയുടെയും മോഹന്ലാലിന്റെയും പൂര്ണ്ണ പിന്തുണയുണ്ട്.
സംഘടനയുടെ പ്രസിഡന്റ് പദവി ലക്ഷ്യമിട്ട് നടന് മുകേഷ് നേരത്തെ തന്നെ കരുനീക്കങ്ങള് നടത്തിയിരുന്നെങ്കിലും, ഇപ്പോഴത്തെ സാഹചര്യത്തില് അദ്ദേഹത്തിന്റെ ആഗ്രഹം നടപ്പിലാകാന് സാധ്യതയില്ലെന്നാണ് സൂചന. സംഘടനയിലുണ്ടായ വിവാദങ്ങളുടെ പശ്ചാത്തലത്തില്, പ്രസിഡന്റ് സ്ഥാനത്തേക്ക് മറ്റൊരാളെ പരിഗണിക്കുന്നതിനേക്കാള് ഉപരിയായി മോഹന്ലാല് തന്നെ വീണ്ടും തലപ്പത്ത് വരണമെന്ന ആവശ്യം അംഗങ്ങള്ക്കിടയില് ശക്തമാണ്. മോഹന്ലാലിന്റെ സാന്നിധ്യം മാത്രമാണ് നിലവിലെ ഭിന്നതകള് പരിഹരിക്കാനുള്ള ഏക പോംവഴിയെന്ന് ഒരു വിഭാഗം താരങ്ങള് വിശ്വസിക്കുന്നു.
“മോഹൻലാൽ കമന്റടിച്ചപ്പോൾ ഞാൻ വിയർത്തുപോയി”; “സ്ഫടികം” ഷൂട്ടിൽ തുടങ്ങിയ അസ്വസ്ഥത; വർഷങ്ങൾക്ക് ശേഷം മോഹൻലാലിനോട് തുറന്നടിച്ച് ജോളി ഈശോ!
അതേസമയം, കെ.ബി. ഗണേഷ് കുമാര് പുതിയ ഭരണസമിതിയില് ഭാരവാഹിത്വത്തിലേക്ക് ഉണ്ടാവില്ലെന്നും ഏതാണ്ട് ഉറപ്പായിട്ടുണ്ട്. വിവാദങ്ങളില് ഉള്പ്പെട്ടവര് പുതിയ കമ്മിറ്റിയുടെ ഭാഗമാകുന്നത് സംഘടനയുടെ പ്രതിച്ഛായയെ വീണ്ടും ബാധിക്കുമെന്ന വിലയിരുത്തലിലാണ് ഈ തീരുമാനം. ഗണേഷ് കുമാറിനെപ്പോലെ വിവാദങ്ങള് നിഴലിക്കുന്ന മറ്റ് ചില നേതാക്കളും പുതിയ സമിതിയിലേക്ക് എത്താനിടയില്ല. തിരഞ്ഞെടുപ്പ് നടത്തിയാല് അത് വീണ്ടും ചേരിതിരിവിനും ഭിന്നതയ്ക്കും കാരണമാകുമെന്ന് സംഘടന ഭയക്കുന്നു. അതുകൊണ്ട്, പരമാവധി തിരഞ്ഞെടുപ്പ് ഒഴിവാക്കി ഒരു ‘സമവായ സമിതി’യെ കൊണ്ടുവരാനാണ് നീക്കം. എക്സിക്യൂട്ടീവ് അംഗങ്ങളെ പോലും സമവായത്തിലൂടെ കണ്ടെത്തി തര്ക്കങ്ങള് ഒഴിവാക്കാനാണ് അഡ്ഹോക്ക് കമ്മിറ്റിയുടെ ശ്രമം. ഈ ദിശയിലുള്ള പ്രാഥമിക ചര്ച്ചകള് അഡ്ഹോക്ക് കമ്മിറ്റി ഇതിനകം തുടങ്ങിക്കഴിഞ്ഞു.
അഡ്ഹോക്ക് കമ്മിറ്റിയുടെ ഭാഗമാണെങ്കിലും, ഔദ്യോഗിക ഭാരവാഹിത്വം താന് ഏറ്റെടുക്കില്ലെന്ന് രമേഷ് പിഷാരടി വ്യക്തമാക്കിയിട്ടുണ്ട്. പാലക്കാട്ടെ മണ്ഡലം പ്രവര്ത്തനങ്ങളിലും നിയമസഭയിലെ തിരക്കുകളിലും ശ്രദ്ധ കേന്ദ്രീകരിക്കേണ്ടതുകൊണ്ടാണ് ഈ പിന്മാറ്റം. എങ്കിലും, സംഘടനയിലെ പ്രതിസന്ധികള് പരിഹരിക്കാന് സാധ്യമായ എല്ലാ പിന്തുണയും അദ്ദേഹം ഉറപ്പുനല്കുമ്പോള് തന്നെ, ഭാരവാഹിത്വത്തിലേക്ക് താനില്ലെന്ന് അദ്ദേഹം തീര്ത്തുപറയുന്നു. ‘എല്ലാവരെയും ഒന്നിച്ച് കൊണ്ടുപോകാനാണ് ശ്രമം. ഒരു സ്ഥിരം കമ്മിറ്റി വൈകാതെ നിലവില് വരും, കാര്യങ്ങള് പഴയപടിയാകും,’ എന്നാണ് പിഷാരടി നല്കുന്ന ഉറപ്പ്. സംഘടനയുടെ പ്രവര്ത്തനങ്ങളില് സുതാര്യത കൊണ്ടുവരാനും അംഗങ്ങള്ക്കിടയില് വിശ്വാസം തിരികെ കൊണ്ടുവരാനുമാണ് ഈ ശ്രമങ്ങള് ഊര്ജ്ജിതമാക്കിയിരിക്കുന്നത്.
വിവിധ പ്രമുഖ താരങ്ങളുമായും മമ്മൂട്ടി, മോഹന്ലാല് തുടങ്ങിയ മുതിര്ന്ന താരങ്ങളുമായും പിഷാരടി ഇതിനകം ആശയവിനിമയം നടത്തിയിട്ടുണ്ട്. ഓരോരുത്തര്ക്കും സംഘടന വിട്ടുപോയിരുന്ന സാഹചര്യത്തില് ഉണ്ടായിരുന്ന പരാതികളും പരിഭവങ്ങളും ആഴത്തില് മനസ്സിലാക്കി അവയ്ക്ക് ഉചിതമായ പരിഹാരം കാണാനാണ് നിലവിലെ ശ്രമം. സംഘടനയുടെ ഇപ്പോഴത്തെ അവസ്ഥ മാനസികമായി ഏറെ വിഷമിപ്പിക്കുന്നുണ്ടെന്നും അത് പരിഹരിക്കാന് തനിക്ക് ഉത്തരവാദിത്തമുണ്ടെന്നും അദ്ദേഹം ചൂണ്ടിക്കാട്ടുന്നു. ഏതായാലും, വരുംദിവസങ്ങളില് നടക്കാന് പോകുന്ന ചര്ച്ചകള് ‘അമ്മ’യുടെ ഭാവി നിര്ണ്ണയിക്കുന്നതില് നിര്ണ്ണായകമാകും. മോഹന്ലാല് വീണ്ടും നേതൃത്വമേറ്റെടുക്കുമോ അതോ പുതിയൊരു തലമുറയ്ക്ക് അവസരം ലഭിക്കുമോ എന്ന ആകാംക്ഷയിലാണ് സിനിമാ ലോകം മുഴുവന്. ഭിന്നതകള് മാറി സംഘടന പഴയ കരുത്തിലേക്ക് തിരികെയെത്തുമെന്ന പ്രതീക്ഷയിലാണ് സിനിമാ പ്രവര്ത്തകര്.
ഇത്തരത്തില് സുഗമമായ ഒരു മാറ്റം സാധ്യമായാല്, അത് ‘അമ്മ’യിലെ പ്രതിസന്ധികള്ക്ക് അന്ത്യം കുറിക്കുമെന്ന് കരുതാം. മുകേഷ് ഉള്പ്പെടെയുള്ളവരുടെ സ്വപ്നങ്ങള്ക്ക് തല്ക്കാലം വിരാമമിട്ട്, മോഹന്ലാലിന്റെ നേതൃത്വത്തില് സമവായത്തിലേക്ക് നീങ്ങാനാണ് സംഘടനയുടെ അണിയറ നീക്കങ്ങള്. ഈ വോട്ടെടുപ്പ് ഒഴിവാക്കിയുള്ള പുതിയ കമ്മിറ്റി രൂപീകരണം സിനിമയിലെ ഗ്രൂപ്പിസത്തിന് അന്ത്യം കുറിക്കും എന്നാണ് വിലയിരുത്തല്.
