ഒരുഭാഗത്ത് ഇറാനുനേരെ ബോംബാക്രമണം, മറുഭാഗത്ത് ഇന്ത്യ, ബ്രസീൽ, കാനഡ, യൂറോപ്പ് എന്നിവയ്ക്കെതിരെ തീരുവയുദ്ധം. യുഎസ് പ്രസിഡന്റ് ഡോണൾഡ് ട്രംപ് ഇരുമുന്നണികളിലും ഒരേസമയം സജീവമാണ്. എന്നാൽ യുഎസിന്റെ സമ്മർദതന്ത്രങ്ങൾക്ക് വഴങ്ങേണ്ടതില്ലെന്ന ഉറച്ച നിലപാടിലാണ് ഇന്ത്യ. എത്ര ഭീഷണിപ്പെടുത്തിയാലും റഷ്യയുമായുള്ള ബന്ധം ഉപേക്ഷിക്കില്ലെന്നാണ് സൂചന.
ഇന്ത്യയുടെ ‘ഓപ്പറേഷൻ സിന്ദൂർ’; മാതൃഭൂമിക്കായി ജീവൻ വെടിഞ്ഞ 6 ധീരജവാന്മാരുടെ പേരുകൾ ആദ്യമായി പുറത്ത്
തീരുവ തിരിച്ചുകൊണ്ടുവരാൻ പുതിയ വഴി
ലോകത്തിലെ മിക്കവാറും എല്ലാ രാജ്യങ്ങൾക്കുംമേൽ ട്രംപ് ഏകപക്ഷീയമായി ചുമത്തിയ പകരംതീരുവ യുഎസ് സുപ്രീം കോടതി നേരത്തേ റദ്ദാക്കിയിരുന്നു. ഇത്തരം തീരുവ ചുമത്താൻ പ്രസിഡന്റിന് അധികാരമില്ലെന്ന് വ്യക്തമാക്കിയ കോടതി, പിരിച്ചെടുത്ത തുക മുഴുവൻ തിരികെ നൽകാനും നിർദേശിച്ചു.
ഇന്ധനക്ഷാമത്തിന് കാരണം യുക്രൈൻ ആക്രമണമെന്ന് പുതിൻ; ഒടുവിൽ സമ്മതിച്ച് റഷ്യ.
ഇതോടെ, ബദൽ മാർഗമായി സെക്ഷൻ 301 പ്രകാരമുള്ള അന്വേഷണം ട്രംപ് ഭരണകൂടം പ്രഖ്യാപിച്ചു. ഇന്ത്യ, ചൈന, യൂറോപ്യൻ യൂണിയൻ, ജപ്പാൻ, സിംഗപ്പൂർ, ഇന്തൊനീഷ്യ, മലേഷ്യ, തായ്ലൻഡ്, ബംഗ്ലദേശ്, വിയറ്റ്നാം, നോർവേ ഉൾപ്പെടെ വിവിധ രാജ്യങ്ങൾ ഇതിന്റെ പരിധിയിലുണ്ട്. കയറ്റുമതി ചട്ടങ്ങൾ മറികടന്നും തൊഴിലാളികളെ ചൂഷണം ചെയ്തും ഉൽപാദനം കൂട്ടി അമേരിക്കയിലേക്ക് അമിതമായി കയറ്റുമതി നടത്തുന്നു എന്നതാണ് ആരോപണം.
കുറ്റക്കാരെന്ന് കണ്ടെത്തുന്ന രാജ്യങ്ങൾക്ക് 10 മുതൽ 12.5 ശതമാനം വരെ അധിക തീരുവ ചുമത്താനും നീക്കമുണ്ട്. ബ്രസീലിന് ഇതിനകം 25 ശതമാനം തീരുവ പ്രഖ്യാപിച്ചുകഴിഞ്ഞു, ഇത് അംഗീകരിക്കില്ലെന്നും തിരിച്ചടിക്കുമെന്നും ബ്രസീൽ വ്യക്തമാക്കിയിട്ടുണ്ട്. കാട്ടുതീയുടെ പുക അമേരിക്കയെ ബുദ്ധിമുട്ടിക്കുന്നു എന്ന കാരണം ചൂണ്ടിക്കാട്ടി കാനഡയ്ക്കുനേരെയും ട്രംപ് തീരുവ ഭീഷണി ഉയർത്തിയിട്ടുണ്ട്.
ഇന്ത്യ പിന്മാറില്ല, റഷ്യൻ എണ്ണ തുടരും
റഷ്യൻ എണ്ണ വാങ്ങുന്നതിന്റെ പേരിൽ ഇന്ത്യ, ചൈന ഉൾപ്പെടെ അഞ്ച് രാജ്യങ്ങൾക്ക് 100 ശതമാനം തീരുവ ചുമത്താനുള്ള ബിൽ യുഎസ് സെനറ്റിൽ തയാറായിക്കഴിഞ്ഞു. 60 സെനറ്റർമാർ ഇതിനെ പിന്തുണയ്ക്കുന്നുണ്ട്. ട്രംപ് ഇതുവരെ ഇതേക്കുറിച്ച് പ്രതികരിച്ചിട്ടില്ലെങ്കിലും, അദ്ദേഹം അനുകൂലിച്ച് ബിൽ പാസായാൽ ഇന്ത്യ-യുഎസ് ബന്ധത്തിൽ കൂടുതൽ വിള്ളൽ വീഴും.
ബില്ലിന്റെ തുടർനടപടികൾ ജാഗ്രതയോടെ വീക്ഷിക്കുകയാണ് ഇന്ത്യ. റഷ്യയിൽനിന്ന് വൻതോതിൽ എണ്ണയും എൽഎൻജിയും വാങ്ങുന്ന യൂറോപ്യൻ യൂണിയൻ രാജ്യങ്ങൾക്കെതിരെ യുഎസ് ഇതുവരെ നടപടിയെടുത്തിട്ടില്ല എന്നത് ചൂണ്ടിക്കാട്ടി, ഇത് ഇരട്ടത്താപ്പല്ലേ എന്ന ചോദ്യം ഇന്ത്യ ഉന്നയിച്ചുകഴിഞ്ഞു.
ഇന്ത്യയുടെ മൊത്തം എണ്ണ ഇറക്കുമതിയിൽ പകുതിയോ അതിലധികമോ ഈ മാസവും അടുത്ത മാസവും റഷ്യയിൽനിന്നായിരിക്കുമെന്നാണ് കണക്കുകൾ. ജൂലൈ, ഓഗസ്റ്റ് മാസങ്ങളിൽ ഇന്ത്യയുടെ പ്രതിദിന എണ്ണ ഇറക്കുമതി 50 ലക്ഷം ബാരൽ ആയിരിക്കുമ്പോൾ, ഇതിൽ 26 മുതൽ 27 ലക്ഷം വരെ ബാരൽ റഷ്യയിൽനിന്നാകും എത്തുക, അതായത് പകുതിയിലധികം.
പശ്ചിമേഷ്യൻ യുദ്ധത്തിനു മുൻപ് 30 ശതമാനമായിരുന്ന റഷ്യൻ എണ്ണയുടെ വിഹിതം ജൂണിൽ 34 ശതമാനമായി ഉയർന്നു. ഹോർമുസ് കടലിടുക്ക് അടയുകയും പശ്ചിമേഷ്യൻ എണ്ണ ഇറക്കുമതി അപകടസാധ്യതയുള്ളതായി മാറുകയും ചെയ്ത സാഹചര്യത്തിൽ, റഷ്യൻ എണ്ണ വാങ്ങൽ തുടരാൻതന്നെയാണ് ഇന്ത്യയുടെ തീരുമാനം.
ഇസ്രയേലിലേക്ക് കൂടുതൽ ഇന്ധന വിമാനങ്ങൾ
ടെൽ അവീവ് വിമാനത്താവളം കേന്ദ്രീകരിച്ച് നിലവിൽ 30 റീഫ്യുവലിങ് വിമാനങ്ങൾ യുഎസ് സേന ഉപയോഗിക്കുന്നുണ്ട്. യുദ്ധവിമാനങ്ങൾക്ക് ഇന്ധനം നിറയ്ക്കാൻ ഉപയോഗിക്കുന്നവയാണിവ. ഇനിയും ഡസൻ കണക്കിന് റീഫ്യുവലിങ് വിമാനങ്ങൾ ഇസ്രയേലിലേക്ക് അയയ്ക്കാനാണ് ട്രംപിന്റെ നീക്കം. ഇറാനെതിരായ യുദ്ധം കൂടുതൽ കടുപ്പിക്കാൻ അമേരിക്ക തയാറെടുക്കുന്നു എന്നാണ് ഇത് സൂചിപ്പിക്കുന്നത്. അമേരിക്കയുടെ ഈ നീക്കത്തോട് ഇസ്രയേൽ ഇതുവരെ ഔദ്യോഗികമായി പ്രതികരിച്ചിട്ടില്ല.
ഇറാന്റെ അടിസ്ഥാനസൗകര്യ പദ്ധതികളും സൈനിക താവളങ്ങളും ലക്ഷ്യമിട്ട് യുഎസ് ആക്രമണം ശക്തമാക്കിയിട്ടുണ്ട്. ഇതിന് മറുപടിയായി ഗൾഫ് മേഖലയിലെ യുഎസ് സൈനിക കേന്ദ്രങ്ങൾ ലക്ഷ്യമിട്ട് ഇറാൻ മിസൈൽ ആക്രമണം നടത്തിവരികയാണ്.
എണ്ണവില 90 ഡോളറിലേക്ക്?
ഇറാൻ-യുഎസ് സംഘർഷം രൂക്ഷമാവുകയും ഹോർമുസ് കടലിടുക്കിലെ കപ്പൽ ഗതാഗതം തടസ്സപ്പെടുകയും ചെയ്തതോടെ എണ്ണവില വീണ്ടും കുതിച്ചുയർന്നു. ഡബ്ല്യുടിഐ ക്രൂഡ് വില 4.5 ശതമാനം ഉയർന്ന് ബാരലിന് 82.49 ഡോളറിലെത്തി. ബ്രെന്റ് ക്രൂഡ് 4.6 ശതമാനം ഉയർന്ന് 88.10 ഡോളറിലുമെത്തി. ഈ പ്രവണത തുടർന്നാൽ വൈകാതെ വില 90 ഡോളർ കടക്കുമെന്നാണ് വിലയിരുത്തൽ.
ഇത് ഇന്ത്യയെ കാര്യമായി ബാധിക്കും. പെട്രോൾ, ഡീസൽ, എൽപിജി, സിഎൻജി എന്നിവയുടെ ലഭ്യത കുറയാൻ സാധ്യതയുണ്ട്, വില കുറയാനുള്ള പ്രതീക്ഷയും മങ്ങും. പണപ്പെരുപ്പം കൂടുതൽ ഉയരാൻ ഇടയുണ്ട്, റിസർവ് ബാങ്ക് അടിസ്ഥാന പലിശനിരക്ക് ഉയർത്തിയേക്കാം. ഇത് സാധാരണക്കാരുടെ കുടുംബ ബജറ്റിനെ ബാധിക്കും, ഓഹരി വിപണികളിലെ ഇടിവ് നിക്ഷേപകരെയും നിരാശരാക്കും.
എന്നാൽ, മികച്ച ജൂൺപാദ പ്രവർത്തനഫലങ്ങളും യുദ്ധം അധികനാൾ നീളില്ലെന്ന പ്രതീക്ഷയും കാരണം ഇന്നലെ ഇന്ത്യൻ ഓഹരി വിപണികൾ ശ്രദ്ധേയമായ നേട്ടം കൈവരിച്ചു. സെൻസെക്സ് 964 പോയിന്റും (+1.25%) നിഫ്റ്റി 261 പോയിന്റും (+1.09%) ഉയർന്നാണ് വ്യാപാരം അവസാനിപ്പിച്ചത്.
സ്വർണവിലയിൽ തിരിച്ചുവരവ്
എണ്ണവില വർധനയും ഡോളറിന്റെ കുതിപ്പും തിരിച്ചടിയായെങ്കിലും സ്വർണവില തിരിച്ചുകയറാനുള്ള ശ്രമത്തിലാണ്. ഇന്നലെ ഔൺസിന് 4,000 ഡോളറിന് താഴെയെത്തിയ രാജ്യാന്തരവില ഇപ്പോൾ 4,017 ഡോളറിലാണ്. കേരളത്തിൽ ഇന്ന് സ്വർണവില ഉയരാനാണ് സാധ്യത.
